Ուկրաինայի զինված ուժերի գլխավոր շտաբը հաղորդել է, որ հինգշաբթի լույս ուրբաթ գիշեր ռուսական բանակը 38 կամիկաձե անօդաչու թռչող սարք և մեկ X-59 թևավոր հրթիռ է արձակել Ուկրաինայի ուղղությամբ։ Գլխավոր շտաբի տվյալներով՝ խոցվել են հրթիռը և 24 անօդաչուն, մնացած 14 անօդաչուի հարվածների հետևանքների մասին տեղեկություն չկա, գրում է BBC-ն։
Գիշերային արշավանքի հետևանքների մասին սուղ տեղեկություններ են հայտնել միայն Խարկովի շրջանի իշխանությունները: Ըստ նրանց՝ Խարկովում և շրջակայքում ավերածություններ և հրդեհներ են եղել։ Բացի Խարկովից, անօդաչու սարքերը հարվածներ են հասցրել Օդեսայի և Լվովի մարզերում։
Ուկրաինայի զինված ուժերի գլխավոր հրամանատար, գեներալ Վալերի Զալուժնին հայտարարել է, որ պատերազմն այժմ թևակոխում է նոր փուլ՝ վերածվելով դիրքային քայքայիչ պատերազմի: Նրա պնդմամբ՝ դա միայն Ռուսաստանի օգտին է, քանի որ Մոսկվային հնարավորություն է տալիս վերականգնելու իր ռազմական ներուժը և մեկ անգամ ևս սպառնալու Ուկրաինայի գոյությանը։
Այդ տեսակի պատերազմին վերջ տալու համար, ըստ գեներալի, ուկրաինական զինված ուժերին անհրաժեշտ են առանցքային ռազմական հնարավորություններ և տեխնոլոգիաներ, հատկապես՝ ավիացիա:
Զալուժնին միաժամանակ վստահեցրել է, որ Ուկրաինան ոչ միայն դադարեցրել է ռուսական հարձակումը, այլև արդեն ազատագրել է իր տարածքի զգալի մասը։
