Sülh müqaviləsi hələ rəsmən imzalanmayıb, amma faktiki olaraq sülh müqaviləsi paraflanıb. Bunu baş nazir Nikol Paşinyan Radio France International-a verdiyi müsahibədə, jurnalistin sülh müqaviləsinin hələ də imzalanmaması ilə bağlı qeydinə cavab olaraq deyib.
“Və 2025-ci il avqustun 8-də Vaşinqtonda sülh bəyannaməsi qəbul edilib və faktiki olaraq artıq iki ildir, iki ildən çoxdur ki, Ermənistan-Azərbaycan sərhədində atışmalar nəticəsində ölən və yaralanan yoxdur. Üstəlik, deyim ki, 2024-cü ildə Ermənistan və Azərbaycan arasında ilk ikitərəfli, məcburi hüquqi qüvvəyə malik sənəd imzalanıb və bu sənəd həm Ermənistanda, həm də Azərbaycanda ratifikasiya edilib. Və həmin sənəd ondan ibarətdir ki, Ermənistan və Azərbaycan arasında delimitasiya prosesində Alma-Ata bəyannaməsi iki ölkə sərhədlərinin müəyyənləşdirilməsinin baza prinsipi olacaq. Və mən sualınıza cavab olaraq qeyd etmək istəyirəm ki, Azərbaycan və Ermənistan arasında faktiki olaraq, müəyyən mənada həm də de-yure, sülh bərqərar olub”, - deyə Paşinyan bildirib.
O, nikbinliyini sülhün artıq bərqərar olması ilə izah edib. “Yəni bu gün heç kim deyə bilməz ki, Ermənistan və Azərbaycan arasında münaqişə var. 1991-ci ildən bəri hər il Ermənistan və Azərbaycan arasında atışmalar nəticəsində ölənlər və yaralananlar olub. Yəni təsəvvür edin, 1991-ci ildən 2025-ci ilə qədər hər il bizim ölənlərimiz və yaralananlarımız olub. İndi isə artıq iki ildir ki, ölən və yaralanan yoxdur, bu nikbinlik üçün əsas deyilmi? İkincisi, Ermənistan və Azərbaycan arasında artıq faktiki delimitasiya baş verib. Və ölkəmizin sərhədyanı kəndləri sülh şəraitində yaşayır”, - deyə Nikol Paşinyan bildirib.
O, azərbaycanlı əsgərlə bağlı insidentdən danışarkən deyib: “Bu müddətdə ümumiyyətlə, son 30 ildə onlarla hal olub ki, hər iki tərəfdən əsgərlər sadəcə duman və ya başqa səbəblərdən yollarını azıblar və Ermənistandan Azərbaycana, Azərbaycandan Ermənistana keçiblər. Və belə hallar onlarla olub. Bu hadisənin sülhlə heç bir əlaqəsi yoxdur və heç bir şəkildə sülhü şübhə altına ala bilməz. Niyə? Çünki ilk növbədə Azərbaycan Ermənistanı məlumatlandırıb ki, onlardan bir əsgər özbaşına xidmət yerini tərk edib və onlar əsgəri axtarsalar da tapa bilmirlər, bundan çıxış edərək onun Ermənistan Respublikasının ərazisinə keçmiş ola biləcəyi ehtimalı var. Hazırda istintaqda olan məlumatlara görə, həmin əsgər keçib, bir evə daxil olub, bir gecə həmin evdə qalıb, evdə heç kim olmayıb, sonra ev sahiblərinin uşaqları gələndə onu görüblər, analarına zəng edib bildiriblər ki, evdə yad adam var. Yəni insident, qısası, heç bir şəkildə Ermənistan-Azərbaycan münasibətlərinə, sülh prosesinə aid deyil. Bu, adi kriminal vəziyyətdir”.
