Հակակոռուպցիոն կոմիտեում ավարտվել է նախկին գլխավոր դատախազ, քննչական կոմիտեի նախկին նախագահ Աղվան Հովսեփյանի վերաբերյալ քրեական գործի նախաքննությունը: Իրավապահները ձեռք են բերել բավարար ապացույցներ, որ Աղվան Հովսեփյանը, 2003-ից մինչև 2018 թվականները՝ բարձրաստիճան տարբեր պաշտոններ զբաղեցնելով, 2007-2015 թթ. մասնակցել է իր մտերիմի հիմնադրած կազմակերպությունների կառավարմանը, միջնորդել, որ դրանց արտոնություններ ու առավելություններ տրվեն: Այդպիսով, Աղվան Հովսեփյանը օրինականացրել է հանցավոր ճանապարհով ստացված առանձնապես խոշոր չափի գույք:
ՀՀ հակակոռուպցիոն կոմիտե - Աղվան Հովսեփյանը, Ա. Ս.-ի հետ 2007 թ. հիմնադրելով տեխնիկական զննման գործունեություն իրականացնող «Տրանս-սիստեմ» ՍՊ ընկերությունը, իրականացրել է դրա կառավարման գործառույթները: Աղվան Հովսեփյանը դիմել է ոլորտը կարգավորող նախարարության բարձրաստիճան պաշտոնատար անձին, և 2007 թ. հիշյալ ընկերությանը տրամադրվել է համապատասխան լիցենզիա: Բացի այդ, Աղվան Հովսեփյանը որոշել է ընկերության մասնակիցների շրջանակը, շահույթի բաշխման կարգն ու չափերը: Ընդ որում` Աղվան Հովսեփյանի որոշմամբ նշված բիզնեսում ներգրավվել են նաև նրա հետ մտերիմ փոխհարաբերությունների մեջ գտնվող ՀՀ գլխավոր դատախազության նախկին աշխատակիցներ, իսկ 2015 թ.-ից ընկերության 100 տոկոս բաժնեմասի սեփականատեր է դարձել նրա որդին` Նարեկ Հովսեփյանը։
Ըստ Հակակոռուպցիոն կոմիտեի տարածած հայտարարության՝ Հովսեփյանը, նույն սխեմայով, նույն միջնորդի միջոցով մասնակցել է ավտոմեքենաների անվադողերի ներմուծմամբ և վաճառքով զբաղվող ընկերությունների կառավարմանը: Միաժամանակ, օգտագործելով իր դիրքն ու կապերը, «Զանգեզուրի պղնձամոլիբդենային կոմբինատ» ընկերության տնօրենի հետ պայմանավորվել է, որ կոմբինատի բեռնատար ավտոմեքենաների անվադողերը գնվեն իր ներկայացրած անձանցից ու ընկերություններից: 2008-2015 թթ. ընթացքում ընկերությանը մատակարարվել է 7 մլրդ դրամի անվադող: Պարզվել է նաև, որ նույն ժամանակաշրջանում նախկին պաշտոնյան ապօրինի մասնակցել է մտերիմի հիմնադրած ևս երկու ընկերությունների կառավարմանը:
ՀՀ հակակոռուպցիոն կոմիտե - Նշված ընկերություններին պատկանող «Վարդահովիտ» և «Վայոց» փոքր հիդրոէլեկտրակայաններին ջրօգտագործման թույլտվություններ անխոչընդոտ տրամադրելու համար Աղվան Հովսեփյանը, օգտագործելով պաշտոնեական դիրքը, դիմել է ոլորտում քաղաքականություն մշակող և իրականացնող լիազոր մարմնի բարձրաստիճան պաշտոնատար անձանց, ու ընկերություններին տրամադրվել են փոքր ՀԷԿ-երի կառուցման և շահագործման համար ջրօգտագործման թույլտվություններ: Վերը նշված ձեռնարկատիրական գործունեությանն ապօրինի մասնակցելու արդյունքում ստացված առանձնապես խոշոր չափերով՝ 788 մլն դրամի հանցավոր ծագումը թաքցնելու նպատակով Աղվան Հովսեփյանը նշված գումարով 2009-2015 թթ. վերանորոգել և կառուցել է առանձնատուն, որի պատկանելությունը թաքցնելու համար նախ՝ այն հաշվառել է որդու՝ Նարեկ Հովսեփյանի անվամբ, այնուհետև` 2015 թ. կնքված անշարժ գույքի առուվաճառքի ձևական պայմանագրով, Նարեկ Հովսեփյանը ավելի քան 1 մլրդ դրամանոց առանձնատունը 90 մլն դրամով իբր վաճառել է մորը՝ Աստղիկ Հովսեփյանին:
Ըստ Հակակոռուպցիոն կոմիտեի՝ 2009-2011 թվականներին էլ Հովսեփյանը՝ ձեռնարկատիրական գործունեությանը մասնակցելու հետևանքով ստացված 55 մլն դրամով Մաշտոցի պողոտայում վերանորոգել է բնակարաններ, գնել ավտոտնակ, գրանցել այլ մարդկանց անուններով և օրինականացրել գումարը: Նախկին գլխավոր դատախազը 2010-2017 թվականների ընթացքում տարբեր գործարքներով ու օրենքի խախտումներով կազմակերպել է որդու անունով 27.8 հա ընդհանուր մակերեսով 10 հողատարածքի վաճառք, որը հետագայում ձևական պայմանագրով վաճառվել է իր ազգականին, ապա նվիրաբերվել՝ կրկին որդուն: Այսպես Հովսեփյանը օրինականացրել է ավելի քան 5 մլն դրամ արժողությամբ հողամասերը:
ՀՀ հակակոռուպցիոն կոմիտե - Նախաքննությամբ պարզվել է նաև, որ Աղվան Հովսեփյանը, նախկին «Երևան հեռուստաընկերություն» ՓԲԸ սեփականատեր Վ. Ղ.-ից տեղեկացված լինելով նրա շահերին առնչվող քրեական գործերի առկայության մասին, 2011 թ. ընթացքում նրանից՝ որպես կաշառք պահանջել է առանձնապես խոշոր չափի` ընկերության 206 մլն դրամ արժողությամբ բաժնետոմսեր, որոնք ստացել է նույն թվականի փետրվարի 14-ին կնքված պայմանագրով, իր որդուն` Արմեն Հովսեփյանին նվիրաբերելու եղանակով: Այնուհետև, անօրինական ճանապարհով ստացված բաժնետոմսերի հանցավոր ծագումը թաքցնելու և խեղաթյուրելու նպատակով, Աղվան Հովսեփյանը հորդորել է Վ. Ղ.-ին հիշյալ բաժնետոմսերը ընկերության մյուս բաժնետոմսերի հետ վաճառել մեկ այլ ընկերության: Բաժնետոմսերի վաճառքից գումարի մի մասը փոխանցվել է որդու անվամբ բացված հաշվեհամարին: Աղվան Հովսեփյանն օրինականացրել է հանցավոր ճանապարհով ստացված ավելի քան 237 մլն դրամը:
Աղվան Հովսեփյանի առաջարկով, վերը նշված անձին պատկանող ավելի քան 672 մլն դրամ արժողությամբ 3 հա հողատարածքը ձևակերպվել է «Տիգրան Մեծ» հրատարակչության գլխավոր տնօրեն Վրեժ Մարկոսյանի անվամբ` որպես Ղարիբյան եղբայրների միջև առկա գույքային տարաձայնությունները հարթելու երաշխիք: Հետո, սակայն, Հովսեփյանը Վրեժ Մարկոսյանին դրդել է հողատարածքը նվիրատվության պայմանագրով գրանցել Նարեկ Հովսեփյանի անվամբ:
Այս արարքների համար Աղվան Հովսեփյանին մեղադրանք է առաջադրվել ձեռնարկատիրական գործունեությանն ապօրինի մասնակցելու, առանձնապես խոշոր չափի կաշառք ստանալու, փողերի լվացման համար: Խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել առանձնապես խոշոր չափի յուրացում կամ վատնում կատարելու համար: Խափանման միջոց է ընտրվել ստորագրություն չհեռանալու մասին:
Աղվան Հովսեփյանի և Վրեժ Մարկոսյանի գործը մեղադրական եզրակացությամբ հանձնվել է հսկողություն իրականացնող դատախազին` այն հաստատելու և դատարան ուղարկելու միջնորդությամբ:
