ԶՈւ գլխավոր շտաբի պետի ազատման գործընթացն ավարտված է. Բադասյան

Վարչական դատարանը բավարարեց գեներալ գնդապետ Օնիկ Գասպարյանի գործով հայցի ապահովման միջոց կիրառելու մասին փաստաբանի միջնորդությունը, որով պահանջվել էր կասեցնել Գասպարյանի պաշտոնանկությունը՝ մինչև գործով վերջնական դատական ակտի կայացումը։

Մարտի 10-ին կառավարությունը հայտարարություն էր տարածել, որ Զինված ուժերի գլխավոր շտաբի պետ Օնիկ Գասպարյանն իրավունքի ուժով համարվում է պաշտոնից ազատված: Օնիկ Գասպարյանը դիմել է վարչական դատարան։ Կառավարությունն այսօր վերահաստատեց՝ Գլխավոր շտաբի պետ Օնիկ Գասպարյանը սահմանադրական նորմի հիմքով մարտի 10-ին ազատվել է զբաղեցրած պաշտոնից։

ՀՀ Սահմանադրության 139-րդ հոդվածի 2-րդ մասի համաձայն՝ համապատասխան ակտը՝ տվյալ դեպքում ՀՀ նախագահի հրամանագիրը, ուժի մեջ է իրավունքի ուժով: Սահմանադիրը նշված սահմանադրական նորմի ուժով ուժի մեջ մտած ակտի շրջադարձի հնարավորություն չի նախատեսել։ Հետևաբար, Օնիկ Գասպարյանն ազատված է ՀՀ ԶՈՒ ԳՇ պետի պաշտոնից, իսկ ՀՀ Սահմանադրության 139-րդ հոդվածի 2-րդ մասով սահմանված ընթացակարգով՝ ՀՀ ԶՈՒ գլխավոր շտաբի նոր պետի նշանակման գործընթացը շարունակվում է։

Արդարադատության նախարար Ռուստամ Բադասյանը ևս պնդում է՝ Զինված ուժերի Գլխավոր շտաբի պետի ազատման գործընթացն ավարտված է:

«Լուսավոր Հայաստանից» Տարոն Սիմոնյանը հիշեցնում է՝ կանխատեսում էր նման սցենար, իսկ Կառավարության պնդումների հետ համաձայն չէ, ասում է՝ գործադիրը վեճի կողմ է և բնական է, որ պետք է առարկություններ ներկայացներ:

Վարչական դատարանի որոշումն անօրինական է որակում խորհրդարանի փոխնախագահ Ալեն Սիմոնյանը: Զինված ուժերի Գլխավոր շտաբի պետի պարտականությունները, Սիմոնյանի պնդմամբ, կատարում է ժամանակավոր պաշտոնակատարը: Փաստաբանի փոխանցմամբ, սակայն, Օնիկ Գասպարյանն այսօր աշխատանքի է գնացել: