ՌԴ նախագահ Վլադիմիր Պուտինն արտաքին հետախուզության ծառայությանը հանձնարարել է ուշադիր հետևել Լեհաստանի գործողություններին ուկրաինական ուղղությամբ, մասնավորապես՝ լեհ-լիտվա-ուկրաինական կազմավորում ստեղծելու ծրագրերին։
Արտաքին հետախուզության ծառայության ղեկավարն ավելի վաղ հայտնել էր, որ Լեհաստանը, Ուկրաինայում տիրող իրավիճակի հետ կապված, ծրագրում է զորքեր տեղակայել իր արևմտյան տարածքներում։ Պուտինն ասել է, որ լեհ-լիտվա-ուկրաինական ռազմական կազմավորում ստեղծելու ծրագրերն ուղղված են Արևմտյան Ուկրաինայի հետագա օկուպացմանը։
Ռուսաստանի Դաշնության անվտանգության խորհրդի մշտական անդամների հետ օպերատիվ հանդիպման ժամանակ պետության ղեկավարը նշել է, որ «խոսքը ոչ թե վարձկանների ինչ-որ խմբի մասին է, որոնք այնտեղ ոչնչացվում են, այլ կանոնավոր, լավ համալրված, զինված զորամիավորման, որը նախատեսվում է օգտագործել Ուկրաինայի տարածքում գործողությունների համար»:
Ըստ Պուտինի՝ այդ ծրագրի վերջնական նպատակն ուկրաինական տարածքների օկուպացիան է: «Եթե լեհական ստորաբաժանումները մտնեն, օրինակ՝ Լվով կամ Ուկրաինայի այլ տարածքներ, ապա այնտեղ էլ կմնան։ Ընդ որում, հավերժ կմնան»,- ասել է ՌԴ նախագահը:
