Մեր գործողություններում ելել ենք այն կանխավարկածից, որ հիշատակի հանդեպ մեր ամենամեծ հարգանքը նաև յուրաքանչյուր քաղաքացու առողջությունն է՝ նշեց ԿԳՄՍ նախարար Արայիկ Հարությունյանը՝ Հայոց ցեղասպանության 105-րդ տարելիցի միջոցառումների մասին խոսելիս։ Նախարարը հավելեց, որ սահմանափակումները հաշվի առնելով ջանք չեն խնայել յուրաքանչյուր քաղաքացու խորհրդանշական ներկայությունը Ծիծեռնակաբերդում ապահովելու համար։
Արտգործնախարար Զոհրաբ Մնացականյանն էլ նշեց, որ անկախ միջոցառումների անցկացման ձևից և դրանց մասնակցության քանակից՝ չի փոխվում օրվա խորհուրդը։
«Ցեղասպանության ճանաչումն ու դատապարտումը մի քանի սերունդների և ամբողջ հայության միասնական գործն է։ Քաղաքական պատգամն այսօրվա առավել քան ընդգծվում է իմաստով, որ մենք իրապես գտնվում ենք բավական անսովոր և դժվար պայմաններում, որը բխում է այս համավարակից։ Բայց մենք նախկինում էլ ենք ունեցել դժվարություններ և չենք դադարել մեր հարգանքը բերել նահատակներին և մեր միասնական համահայկական ձայնը հնչեցնել ցեղասպանությունների դեմ»,-նշեց Մնացականյանն ու հավելեց, որ ընտրված ձևաչափը կօգնի մասնակցություն ունենալ Հայաստանին, Արցախին ու Սփյուռքին միաժամանակ և միասնական ձայնը հնչելի դարձնել։
Սփյուռքի գործերով հանձնակատար Զարեհ Սինանյանն էլ նշեց, որ չնայած կորոնավիրուսը սահմանափակել է մեր հնարավորությունը ֆիզիկապես մասնակցել Հայոց ցեղասպանության տարելիցի միջոցառումներին և՛ Հայաստանում, և՛ Սփյուռքում, բայց ջանք չի խնայվել այնպիսի ձևաչափ որդեգրել, որը հնարավորություն կտա բարոյական մասնակցության։
