Հայաստանի ֆուտբոլի ֆեդերացիայի նախկին նախագահ, Ազգային ժողովի հանրապետական նախկին պատգամավոր Ռուբեն Հայրապետյանին առնչվող քրեական գործն ուղարկվել է Քննչական կոմիտե: Այս տեղեկությունը «Լուրեր»-ին փոխանցել է ՀՀ ոստիկանության տեղեկատվության վարչության պետ Աշոտ Ահարոնյանը: Այլ մանրամասներ չի հայտնել: ՔԿ հասարակայնության հետ կապերի վարչության պետ Նաիրա Հարությունյանը հաստատել է, որ գործը ՔԿ-ում է: «Մենք այն ստացել ենք և ընդունել ենք վարույթ»,- ասել է Հարությունյանը:
«Լուրեր»-ի տեղեկություններով՝ քրեական գործը կապված է Հայրապետյանին պատկանող ընկերությունների և Ֆեդերացիայի գործարքների հետ: Եվս մեկ տեղեկություն հասանելի դարձավ՝ կապված 2008-ին Հայաստան-Թուրքիա ֆուտբոլային խաղից առաջ «Հրազդան» մարզադաշտի վերանորոգման հետ: Խաղից առաջ Եվրոպական ֆուտբոլային ասոցիացիաների միությունը խոշոր գումար է փոխանցել ֆեդերացիային՝ մարզադաշտը կահավորելու համար, սակայն գումարները նպատակային չեն ծախսվել:
«Լուրեր»-ը զրուցել է նաև «Հրազդան» մարզադաշտի սեփականատեր Աշոտ Աղաբաբյանի հետ, որը հաստատել է հիշյալ տեղեկությունը: Կապ հաստատեցինք նաև Ռուբեն Հայրապետյանի հետ, որն ասաց՝ լրագրողներին հարցազրույց չի տալիս, և անջատեց հեռախոսը:
