Պակիստանի Փեշավար քաղաքում փլուզվել է եռահարկ մասնավոր դպրոցի տանիքը, որի հետևանքով զոհվել են առնվազն 34 երեխա և մեկ ուսուցիչ, ավելի քան 50-ը՝ վիրավորվել, հաղորդում է Associated Press-ը։
«Լեդի Ռեդինգ» հիվանդանոցի խոսնակը հայտնել է, որ զոհված և վիրավոր երեխաները 6-14 տարեկան են։ Նրանցից մի քանիսը գտնվում են ծանր վիճակում։ Հիվանդանոցը հայտարարել է արտակարգ իրավիճակ։
Փրկարարական ծառայության խոսնակն ասել է, որ փրկել են ներսում մնացած բոլոր մարդկանց։ Ըստ Associated Press-ի՝ փլուզվել են երկու դասարանի տանիքները, իսկ ներսում եղել են երկրորդ և երրորդ դասարանների աշակերտներն ու նրանց ուսուցիչները:
Փրկարարական գործողությանը մասնակցել է մոտ 100 մասնագետ։ Արագ տարհանումը օգնել է փրկել 40 կյանք։
Իրավապահ մարմինների աշխատակիցները սկսել են միջադեպի հետաքննությունը։ Փեշավարի ոստիկանապետը հայտարարել է, որ դպրոցի սեփականատերը ձերբակալվել է։
