Պուտինն ու Վուչիչն ընդգծել են ընտրական գործընթացներին արտաքին միջամտության անթույլատրելիությունը
Ռուսաստանի և Սերբիայի ղեկավարները հեռախոսազրույց են ունեցել: Ըստ Կրեմլի հաղորդագրության՝ Ալեքսանդր Վուչիչը շնորհավորել է Վլադիմիր Պուտինին՝ Պետդումայի ընտրությունների արդյունքների կապակցությամբ, որոնց համաձայն՝ «Միասնական Ռուսաստանը» ստացել է 349 մանդատ՝ ընդհանուր 450-ից: Հաղորդագրության համաձայն՝ Վուչիչը տեղեկացրել է, որ Սերբիան պատրաստվում է խորհրդարանական արտահերթ ընտրությունների։
«Նախագահներն ընդգծել են ընտրական գործընթացներին արտաքին միջամտության անթույլատրելիությունը»,- նշված է Կրեմլի կայքում։
2017 թվականից Սերբիայի նախագահի պաշտոնը զբաղեցնող Վուչիչը տեղեկացրել է, որ առաջիկա օրերին հրաժարական է ներկայացնելու։ Նա գլխավորելու է «Միավորված Սերբիա» դաշինքի ընտրական ցուցակը և հոկտեմբերի 25-ին նշանակված արտահերթ խորհրդարանական ընտրություններում հավակնելու է վարչապետի պաշտոնին։
Պաշտոնյաներն անդրադարձել են երկկողմ հարաբերությունների զարգացման դինամիկային, այդ թվում՝ էներգետիկայի, նավթագազային, տրանսպորտի և առողջապահության ոլորտներում, քննարկել միջազգային զարգացումները, ի թիվս՝ ռուս-ուկրաինական հակամարտությունը։
«Ես հավատում եմ, որ այսօրվա զրույցից հետո գազի համաձայնագիրը կերկարաձգվի, և մենք կապահովենք կայուն գազամատակարարում։ Սերբիայի քաղաքացիները պետք է իմանան, որ մենք նախկինի պես կունենանք գազի լավ, ցածր գին՝ 318 եվրո հազար խորանարդ մետրի դիմաց, շուկայական գնի փոխարեն, որն այժմ կազմում է 868 եվրո»,- հեռախոսազրույցից հետո սոցցանցերում գրել է Վուչիչը:
Դիտումներ67
