Քաղաքացիական օրենսգրքում առաջարկվում է ներդնել հետադարձ հիփոթեքի և հետադարձ հիփոթեքի վարկային պայմանագրի ինստիտուտները
Քաղաքացիական օրենսգրքում առաջարկվում է ներդնել երկու նոր ինստիտուտ՝ հետադարձ հիփոթեքը՝ որպես գրավի նոր տեսակ և հետադարձ հիփոթեքի վարկային պայմանագիրը: Նախագծով առաջարկվում է նաև ներդնել իրավունքի նոր տեսակ՝ «ամուսնու բացառիկ սեփականության իրավունք», որը նախատեսում է, որ ամուսնության ընթացքում ձեռք բերված գույքը կարող է ամրագրվել նաև որպես ամուսնու բացառիկ սեփականությունգ այս մասին ասել է ՀՀ կադաստրի կոմիտեի ղեկավարի տեղակալ Նանե Ղազարյանը: Ֆինանսավարկային և բյուջետային հարցերի մշտական հանձնաժողովի մայիսի 18-ի նիստում առաջին ընթերցմամբ քննարկվել է «Հայաստանի Հանրապետության քաղաքացիական օրենսգրքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը:
Կարգավորումը կապահովի կենսապայմանների շարունակականությունը՝ նպաստելով արժանապատիվ ծերությանը: Ամուսնության ընթացքում գույքի գրանցումը, որպես ամուսնու բացառիկ սեփականություն, նաև ապահովում է իրավական հստակություն և գույքային հարաբերությունների կանխատեսելի զարգացում՝ ամրապնդելով ամուսնու սոցիալական պաշտպանվածությունը: Այսպիսով՝ ընդլայնվում են քաղաքացու՝ սեփական գույքը տնօրինելու իրավասությունները՝ թույլ տալով կենսաթոշակային տարիքի հասնելուց հետո պահպանել այդ գույքը, բայց միևնույն ժամանակ այն վերածել կապիտալի և ստանալ կայուն եկամուտ:
Նախագծի ընդունման արդյունքում կաճի անշարժ գույքի շուկայի մեջ ներգրավված կապիտալի շրջանառությունը, ինչի շնորհիվ շուկան կդառնա ավելի ակտիվ և կանխատեսելի: Անշարժ գույքի այն հատվածը, որը մինչև հիմա գտնվել է պասիվ սպառողական օգտագործման դաշտում, կդառնա շրջանառվող ֆինանսական ակտիվ՝ ապահովելով նոր դրամական հոսքեր և եկամտաբերություն: Անշարժ գույքի շուկան կդառնա ավելի բազմաշերտ՝ կձևավորվեն շուկայի նոր մասնակիցներ: Նշվել է, որ հետադարձ հիփոթեքի և ամուսնու բացառիկ սեփականության իրավունքի ինստիտուտների ներդրումը ոչ միայն անշարժ գույքի զարգացման, այլև սոցիալական պետության համար կարևոր քայլ է: Այն միաժամանակ ապահովում է սեփականության իրավունքի լիարժեք իրացումը, ֆինանսական գործիքների ընդլայնումը և քաղաքացիների համար ստեղծում է նոր հնարավորություն՝ իրենց գույքի արժեքը վերածելու կայուն եկամտի:
Նանե Ղազարյանը պատասխանել է պատգամավորների հարցերին՝ ներկայացնելով պարզաբանումներ առաջարկվող փոփոխությունների, կարգավորումների և սահմանումների վերաբերյալ:
Օրենսդրական փաթեթը ստացել է դրական եզրակացություն:
