Եվրոպան դատապարտում է Իսրայելի գործողությունները Լիբանանում և Արևմտյան ափին
Գերմանիայի կանցլեր Ֆրիդրիխ Մերցն Իսրայելի վարչապետ Բենիամին Նեթանյահուի հետ հեռախոսազրույցում կոչ է արել նրան խաղաղության ուղիղ բանակցություններ սկսել Լիբանանի կառավարության հետ: Գերմանիայի կառավարության ղեկավարը նաև կոչ է արել դադարեցնել այդ երկրի հարավում ընթացող մարտերը, միաժամանակ հայտարարել, որ արմատական շիա «Հըզբոլլահ» շարժումը պետք է զենքը վայր դնի։
Մերցը մտահոգություն է հայտնել նաև պաղեստինյան տարածքներում տեղի ունեցող զարգացումների վերաբերյալ: «Արևմտյան ափի փաստացի մասնակի անեքսիա չպետք է լինի»,- նրա խոսքերը մեջբերել է Գերմանիայի կառավարության մամուլի ծառայությունը։
Մեծ Բրիտանիայի վարչապետ Քիր Սթարմերն էլ սխալ է անվանել Իսրայելի կողմից Լիբանանին հարվածները և կոչ է արել Թել Ավիվին անհապաղ դադարեցնել ռմբակոծությունները։
Սթարմերի խոսքով՝ հրադադարը պետք է տարածվի նաև Լիբանանի վրա: «Դիվանագիտությունը ճիշտ ուղին է, և ես ողջունում եմ ԱՄՆ-ի ու Իրանի միջև բանակցությունները»,- ասել է նա։
Մեծ Բրիտանիայի վարչապետն էլ է ընդգծել, որ «Հըզբոլլահ» խմբավորումը պետք է զինաթափվի։
Ի պատասխան այդ մտահոգություններին՝ Իսրայելի վարչապետը, ելույթ ունենալով իսրայելական հեռուստատեսությամբ, հայտարարել է, որ «Եվրոպան կորցնում է իր ինքնության նկատմամբ վերահսկողությունը՝ խոր բարոյական թուլության պատճառով»։
