ԱՄՆ-ը պնդում է, որ Իրանը դադարեցնի ուրանի հարստացումը 20 տարով
Անցյալ շաբաթավերջին Իսլամաբադում իրանցի պաշտոնյաների հետ բանակցությունների ժամանակ ԱՄՆ պաշտոնյաները պնդել են, որ Թեհրանը դադարեցնի ուրանի հարստացումը 20 տարով, սակայն մերժում են ստացել՝ հաղորդում է The New York Times-ը՝ հղում անելով տեղեկացված աղբյուրներին։
Երկու բարձրաստիճան իրանցի և մեկ ամերիկացի պաշտոնյայի խոսքով՝ երկուշաբթի ուղարկված պաշտոնական պատասխանում իրանցիները նշել են, որ կհամաձայնվեն մինչև հինգ տարի ժամկետի հետ։
Աղբյուրներից մեկի փոխանցմամբ՝ ԱՄՆ նախագահ Դոնալդ Թրամփն էլ մերժել է այդ առաջարկը։
Ամերիկացի պաշտոնյան պարբերականին հայտնել է նաև, որ ԱՄՆ-ն Իրանին առաջարկել է երկրից հանել բարձր հարստացված ուրանը: Իրանցիները, սակայն, պնդել են, որ վառելիքը մնա երկրի ներսում։ Միևնույն ժամանակ, նրանք առաջարկել են զգալիորեն նոսրացնել այն, որպեսզի ոչ պիտանի դառնա միջուկային զենքի արտադրության համար:
Պարբերականի տեղեկություններով՝ քննարկվում է նաև երկու երկրների պաշտոնյաների միջև անձնական հանդիպումների ևս մեկ փուլ անցկացնելու հնարավորությունը։
Bloomberg-ի աղբյուրների համաձայն՝ նպատակն է նոր բանակցությունները վարել մինչև ապրիլի 7-ին հայտարարված հրադադարի երկշաբաթյա ժամկետի ավարտը: Իսլամաբադից բացի, քննարկվում է նաև հանդիպումը Թուրքիայում կամ Եգիպտոսում անցկացնելու հնարավորությունը:
