Քաղաքաշինության կոմիտեի նախագահը հետևել է Արարատի մարզի առողջապահական հաստատությունների շինարարական աշխատանքներին
Առողջապահական հաստատությունների շինարարական աշխատանքների ընթացքի վերահսկողության նպատակով Քաղաքաշինության կոմիտեի նախագահ Եղիազար Վարդանյանը շրջայց է կատարել Արարատի մարզի շինհրապարակներ:
ՀՀ վարչապետի աշխատակազմի, նախագծային, շինարարական և տեխնիկական հսկողություն իրականացնող ընկերությունների ներկայացուցիչների, կոմիտեի քաղաքաշինական ծրագրերի իրականացման վարչության պետ Արմեն Զոհրաբյանի և վարչության մասնագետների հետ նա դիտարկել է Մասիսի բժշկական կենտրոնի կառուցման ընթացքը։ Շինարարական աշխատանքների որակը հիմնականում գոհացուցիչ է եղել։ Կոմիտեի ղեկավարն առաջարկել է ներգրավել լրացուցիչ աշխատուժ՝ շինարարության տեմպն արագացնելու, նախատեսվող աշխատանքները սեղմ ժամկետում իրականացնելու նպատակով։
Հաջորդիվ դիտարկվել է Արտաշատի պոլիկլինիկայի վերակառուցման ընթացքը։ Շինարարությունը հիմնականում ավարտված է։ Արձանագրվել են որոշ թերություններ, որոնք կոմիտեի նախագահը հանձնարարել է շտկել կարճ ժամանակում և համապատասխանեցնել առաջադրված պահանջներին։
