Ուկրաինայից ապօրինի դուրս բերված 1625 երեխայի հաջողվել է տուն վերադարձնել․ Զելենսկի
Ուկրաինայի նախագահ Վոլոդիմիր Զելենսկին, ելույթ ունենալով ՄԱԿ-ի Գլխավոր ասամբլեայի 80-րդ նստաշրջանի շրջանակում Նյու Յորքում կայացած՝ ուկրաինացի երեխաների վերադարձին նվիրված Միջազգային կոալիցիայի նիստում, հայտնել է, որ Bring Kids Home ծրագրի շրջանակում հաջողվել է Ուկրաինա վերադարձնել երկրից «ապօրինի դուրս բերված 1625 երեխայի»։
Նա նաև հայտարարել է նոր ծրագրի մեկնարկի մասին, որը միտված է Ռուսաստան և ՌԴ վերահսկողության տակ գտնվող տարածքներ տեղափոխված երեխաների վերաբերյալ բոլոր տվյալների հավաքագրմանը։
«Ռուսաստանը թաքցնում է ճշմարտությունը, ուստի այս աշխատանքը հիմնարար է։ Դա նշանակում է ֆինանսավորում, որոնում, տեղեկատվության վավերացում և ջանքեր՝ համոզվելու համար, որ մեղավորները պատասխանատվությանկենթարկվեն»,-նշել է Զելենսկին։
Նիստում ելույթ են ունեցել նաև Ուկրաինայի նախագահի կին՝ Ելենա Զելենսկան, Կանադայի վարչապետ Մարկ Քարնին, Լատվիայի նախագահ Էդգարս Ռինկևիչսը, Ֆինլանդիայի նախագահ Ալեքսանդր Ստուբը, Չեխիայի նախագահ Պետր Պավելը և Բելգիայի թագուհի Մաթիլդան։ Նրանք հանդես են եկել կոչով՝ ուժեղացնելու ճնշումը Ռուսաստանի վրա, որպեսզի արագացվի ընտանիքներից բաժանված ուկրաինացի երեխաների վերադարձը տուն։
