ՀՀ էկոնոմիկայի նախարարին է ներկայացվել «Սյունիք․ Հարավային Կովկասի տնտեսական հաբ» ծրագիրը

ՀՀ էկոնոմիկայի նախարար Գևորգ Պապոյանը մայիսի 5-ին ընդունել է «Հայաստան-Իրան համագործակցության զարգացման հիմնադրամի» տնօրեն Փույա Հոսեյնիին։ Այս մասին տեղեկացնում են ՀՀ էկոնոմիկայի նախարարությունից:

Հանդիպման ընթացքում նախարարին ներկայացվել է «Սյունիք․ Հարավային Կովկասի տնտեսական հաբ» ծրագիրը, որի նպատակն է զարգացնել Սյունիքի մարզը որպես տարածաշրջանային տնտեսական հանգույց՝ խթանելով մասնավոր հատվածի ներդրումների ներգրավմանը, ենթակառուցվածքների զարգացմանը և Հայաստան-Իրան տնտեսական համագործակցության ընդլայնմանը։ 

Ծրագրով նախատեսվում են տարբեր ձևաչափով միջոցառումների, այդ թվում՝ երկկողմ մասնագիտական համաժողովների ու գործարար այցելությունների կազմակերպում և ներդրումային փաթեթների ներկայացում։

Զրուցակիցները մտքեր են փոխանակել ծրագրի շրջանակում նախատեսվող քայլերի, ինչպես նաև ծրագրի իրականացման նպատակով պետության կողմից հնարավոր աջակցությանը վերաբերող հարցերի շուրջ։