Մեծանուն հայ երգահան ու երաժշտագետ Կոմիտասի ծննդյան 150-ամյակի առթիվ Ստամբուլում համերգ կկայանա։
«Հնչում է Առավոտ լուսոն» խորագրով համերգին կմասնակցեն մի շարք անվանի արվեստագետներ ու երաժշտական խմբեր Թուրքիայից, ԱՄՆ-ից և Հայաստանից: Համերգի ընթացքում Կոմիտասի ստեղծագործությունները կկատարեն Գևորգ Դավթյանը, Լևոն Էրոյանը, «Լուսավորիչ» մանկական երգչախումբն ու Սևանա Չաքերյանը, Շևվալ Շամը, «Ոմանք» երաժշտական խումբը, Հայաստանից հրավիրված «Գողթ» երաժշտական խումբը, ԱՄՆ-ից հրավիրված Արա Դինքչյանը և «Զուլալ» եռյակը։
Թուրքական երկու մշակութային կենտրոնների և Մաքսիմ Գորկու անվան թատրոնի համագործակցությամբ կազմակերպված համերգը տեղի կունենա հոկտեմբերի 7-ին՝ ժամը 20։30-ին, Ստամբուլում։ Համերգը նաև ուղիղ եթերով կհեռարձակի Kalan Müzik-ի յութուբյան էջը։
