Müdafiə Nazirliyinin inzibati kompleksində Ermənistan müdafiə nazirinin birinci müavini, Silahlı Qüvvələrin Baş Qərargah rəisi, general-leytenant Edvard Asryan ilə Gürcüstan Müdafiə Qüvvələrinin komandanı, general-leytenant Giorgi Matiaşvili arasında görüş keçirilib. Bu barədə Müdafiə Nazirliyindən məlumat verilib.
Görüş zamanı müdafiə sahəsində Ermənistan-Gürcüstan əməkdaşlığına dair məsələlər, xüsusilə silahlı qüvvələrdə aparılan islahatlar və transformasiya prosesləri çərçivəsində təcrübə mübadiləsi imkanları müzakirə olunub. Tərəflər yüksək səviyyəli qarşılıqlı səfərləri və müzakirələri davam etdirmək barədə razılığa gəliblər.
Həmsöhbətlər ikitərəfli planlaşdırma formatı çərçivəsində tədbirlərin həyata keçirilməsinin, müxtəlif istiqamətlərdə, o cümlədən hərbi təhsil, şəxsi heyətin hazırlığı, hər iki ölkədə keçirilən birgə hərbi təlimlərdə iştirak, məlumat mübadiləsi, xüsusi təyinatlı və ərazi müdafiə qüvvələrinin fəaliyyəti sahələrində peşəkar təcrübə mübadiləsinin vacibliyini vurğulayıblar.
