Böyük Britaniya avropalı tərəfdaşları ilə ABŞ prezidenti Donald Trampın təşəbbüsündə iştirakını müzakirə edir. O, Ukrayna üçün irimiqyaslı silah alışını nəzərdə tutur ki, bu da Kiyevin Avropadakı müttəfiqləri tərəfindən ödəniləcək. Bu barədə Bloomberg vəziyyətlə tanış olan anonim mənbəyə istinadən məlumat yayıb.
Agentliyin məlumatına görə, danışıqlar ilkin mərhələdədir, lakin Britaniyanın baş naziri Keir Starmer artıq Londonun satınalmalarda mümkün iştirakına eyham vurub.
Bir neçə gün əvvəl ABŞ prezidenti Ukraynaya irimiqyaslı hərbi yardım, o cümlədən Kiyevin çoxdan xahiş etdiyi bahalı Patriot hava hücumundan müdafiə sistemlərinin tədarükü planını təqdim edib. Trampın bəyanatına görə, “çatdırılmaya hazır” olan ən azı 17 qurğu ola bilər.
“The New York Times”ın yazdığına görə, Ukraynada cəmi səkkiz “Patriot” hava hücumundan müdafiə sistemi var. Almaniya ən azı iki Patriot hava hücumundan müdafiə sisteminin alınmasında iştirakını təsdiqləyib. Danimarka, İsveç və Hollandiya da təşəbbüsü dəstəklədiklərini bildiriblər.
