Digital Forensic Research Lab-ը ծավալուն հոդվածով անդրադարձել է պատերազմի ընթացքում Ադրբեջանի կողմից Արցախի ուղղությամբ արգելված ֆոսֆորային զինամթերքի կիրառմանը՝ նշելով, որ արբանյակային պատկերը ցույց է տալիս ԼՂ-ում սպիտակ ֆոսֆորի օգտագործման արդյունքում շրջակա միջավայրին հասցված վնասը:
«Արմենպրեսի» հաղորդմամբ՝ մասնավորապես նշված է, որ մարտական գործողությունների վերջին շաբաթվա ընթացքում բաց աղբյուրների արբանյակային պատկերները ցույց են տալիս, որ Ադրբեջանի կողմից Լեռնային Ղարաբաղի անտառների վրա սպիտակ ֆոսֆորական զինամթերք օգտագործելու արդյունքում առաջացել է շրջակա միջավայրի ավերածություն:
Սակայն նշվում է, որ Ադրբեջանը հերքում է սա՝ մեղադրելով, թե, իբր, հայկական կողմն է կիրառել ֆոսֆոր իրենց կողմից վերահսկվող տարածքների ուղղությամբ: Սակայն հոդվածագիրը արդարացիորեն նկատել է, որ այս պնդումը փաստող ոչ մի ապացույց չկա բաց աղբյուրներում: «Արբանյակային պատկերը, այնուամենայնիվ, հաստատում է Հայաստանի վերահսկողության տակ գտնվող տարածքի անտառային մեծ հատվածում հրդեհի արդյունքոմ պատճառված մեծ վնասը, միևնույն ժամանակ, հայտնվել են Ադրբեջանի ֆոսֆորային զինամթերքի օգտագործման տեսանյութերը: Անտառածածկ տարածքների թիրախավորումը ռազմավարություն է, որը երբեմն օգտագործվում է տարածքներից մարտական գործողությունները դուրս մղելու կամ շրջակա միջավայրին մեծ ավերածություն պատճառելու նպատակով»,- գրված է Digital Forensic Research Lab-ի հոդվածում:
Նշվում է նաև, որ որոշ տեսանյութեր նկարահանվել են հայ զինվորների կողմից, որոնցում երևում է, որ սպիտակ ֆոսֆորային զինամթերքն ընկնում է պաշտպանական դիրքերի վրա:
