Միացյալ Նահանգների և Կենտրոնական Ասիայի ղեկավարների գագաթնաժողովի շրջանակում Դոնալդ Թրամփն անդրադարձել է TRIPP-ի նախագծին, որի շուրջ համաձայնություն է ձեռք բերվել Վաշինգտոնում՝ Հայաստանի, Ադրբեջանի և Միացյալ Նահանգների ղեկավարների հանդիպման արդյունքում: Սպիտակ տան ղեկավարը հայտարարել է՝ այդ երթուղին անցնում է աշխարհի տնտեսապես կարևոր տարածաշրջանով և կխթանի Կասպից ծովից այն կողմ առևտրի ակտիվությունը և կօգնի Կենտրոնական Ասիայի ժողովուրդներին։ Թրամփն ընդգծել է, որ նախագիծը հնարավոր է դարձել Հայաստանի և Ադրբեջանի միջև ձեռք բերված պատմական համաձայնագրի արդյունքում։
«Կողմերն այն անվանել են իմ անունով՝ «Թրամփի ուղի հանուն միջազգային խաղաղության և բարգավաճման»: Իսկապես գնահատում եմ այդ փաստը։ Հիանալի համաձայնագիր է։ Վստահ եմ, որ այստեղ ներկաները կօգտվեն դրա հնարավորություններից»,- նշել է Թրամփը։
Միջազգային զարգացումները՝ տեսաշարում:
