Անհանգստությունը կա, սակայն վտանգ չկա. Նարեկ Ղահրամանյանը՝ Սյունիքում ադրբեջանական կողմի կրակոցների մասին
Խորհրդարանում լրագրողներն այսօր սահմանային կրակոցների վերաբերյալ հարց ուղղեցին ԱԺ «Քաղաքացիական պայմանագիր» խմբակցության պատգամավոր Նարեկ Ղահրամանյանին:
Նրա խոսքով՝ դեռևս 2000-ականներից՝ դեպքեր են լինում, երբ մենք ենք օդ կրակում, դեպքեր են լինում, երբ՝ ադրբեջանական կողմը:
«Դա հակառակորդին տեղյակ պահելու մասին է, որ մենք մեր դիրքերում ենք, և նույնն էլ իրենք էին անում: Վերջին օրերի այս կրակոցները, քաջատեղյակ եմ, չէին կրում թիրախավորված և ինտենսիվ բնույթ, վիրավորներ չկան»,- ասաց պատգամավորը
Լրագրողների հարցին՝ արդյոք նա դրանում վտանգ չի՞ տեսնում, վերջինս պատասխանեց՝ եթե կա կրակոց, վտանգ, ամեն դեպքում, կա:
Դիտարկմանը, թե այդ դեպքում ինչո՞ւ ՀՀ պաշտպանության նախարարությունը չի տեղեկացնում կրակոցների մասին, պատգամավորն ասաց. «Պաշտպանության նախարարության հաղորդագրությունը կարդացել եք, ինչ-որ անհասկանալի բան կա՞ գրած»:
Նա չժխտեց, որ անհանգստությունը կա, սակայն վտանգ չկա:
«Նախ՝ իրենք ինտենսիվ չեն կրակում, երկրորդ՝ չեն թիրախավորում մեր դիրքերը, և այսպես ասած այդ անհանգստությունն առաջացնելու համար է արվում մեծ մասամբ, և խաղաղության օրակարգը նսեմացնելու համար»,- մանրամասնեց պատգամավորը:
Հարցին՝ ինչո՞ւ է Ադրբեջանը ցանկանում նսեմացնել խաղաղության օրակարգը, Ղահրամանյանը պատասխանեց՝ շատ պարզ պատճառով՝ չի ցանկանում խաղաղության պայմանագիր կնքել:
Հիշեցնենք՝ ՀՀ պաշտպանության նախարարությունը հանդես էր եկել պարզաբանմամբ՝ նշելով, որ Հայաստան-Ադրբեջան սահմանագծի երկայնքով երբեմն արձանագրվում են կրակոցներ, որոնք չեն թիրախավորում ՀՀ տարածքը:
