Ուկրաինայում պատերազմը խելագարություն կլինի. Ֆրանցիսկոս Պապ

ԱԼԻԵՎԸ ԶԼՄ-ՆԵՐԻ ՎԵՐԱԲԵՐՅԱԼ ՆՈՐ ՕՐԵՆՔ Է ՍՏՈՐԱԳՐԵԼ

Ադրբեջանի նախագահ Իլհամ Ալիևը նախօրեին ստորագրել է մեդիադաշտին առնչվող աղմկահարույց նոր օրենքը, որը, ըստ տարբեր փորձագետների, միտված է բարդացնելու լրագրողների կյանքը։ BBC-ի ռուսական ծառայությունն անդրադառնալով թեմային՝ գրում է, որ լրատվամիջոցների մասին նոր օրենքի համաձայն՝ Ադրբեջանում կներդրվի զանգվածային լրատվության միջոցների միասնական ռեգիստր։ Լրագրողները պարտավոր են գրանցվել միասնական համակարգում, նշել իրենց տվյալները, և լրագրողներն ու լրատվամիջոցները չեն կարող ֆինանսավորում ստանալ արտերկրից: Օրենքի նախագիծն ավելի քան 7 ամիս թաքցվել է հանրությունից։ Այն ենթադրում է, որ բարձրագույն կրթություն չունեցողները, անաշխատունակները, նախկինում ծանր հանցագործություններ կատարած անձինք չեն կարող գրանցվել համակարգում, հիմնել լրատվամիջոց: Կուսակցությունները կարող են ստեղծել միայն տպագիր մամուլ։ Նոր օրենքն արժանացել է մի շարք միջազգային կազմակերպությունների քննադատությանը: Ադրբեջանի լրագրողական համայնքը նույնպես արդեն անհանգստության ահազանգ է հնչեցրել:

ՍԱԱԿԱՇՎԻԼԻԻ ՀԱՅՏԱՐԱՐՈՒԹՅՈՒՆԸ ԴԱՏԱԿԱՆ ՆԻՍՏԻ ԺԱՄԱՆԱԿ

Թբիլիսիում կայացած դատական նիստի ժամանակ Վրաստանի նախկին նախագահ Միխեիլ Սաակաշվիլին հայտարարել է, որ ինքն է ստիպել Լուկաշենկոյին չճանաչել Աբխազիայի և Հարավային Օսիայի անկախությունը: «Ես Լոնդոնում չորս գաղտնի հանդիպում եմ ունեցել Լուկաշենկոյի հետ։ Դա գաղտնի դիվանագիտություն էր։ Այն, որ Լուկաշենկոն դեռ չի ճանաչել Հարավային Օսիայի և Աբխազիայի անկախությունը, Լոնդոն կատարած իմ այցերի արդյունքն է»,- ասել է Սաակաշվիլին։ Բացի այդ, դատական նիստի ժամանակ ամբաստանյալը խլել է Ուկրաինայի դրոշը և երգել այդ երկրի օրհներգը։ Երաժշտությանը միացել է նրա փաստաբանը: Վրաստանի նախկին նախագահն անհիմն է համարում պետական միջոցների յուրացման համար իրեն ներկայացված մեղադրանքները։

ԱՄՆ ՊԵՏՔԱՐՏՈՒՂԱՐԸ ԱՎՍՏՐԱԼԻԱՅՈՒՄ Է

Միացյալ Նահանգների պետքարտուղար Էնթոնի Բլինքենն Մելբուռնում է՝ մասնակցելու ԱՄՆ-ի, Ճապոնիայի, Հնդկաստանի և Ավստրալիայի ԱԳ նախարարների հանդիպմանը: Հանդիպման հիմնական թեմաներն են՝ կլիմայի փոփոխությանն առնչվող քաղաքականությունը, Հարավասիական տարածաշրջանում քովիդի դեմ պատվաստումների ապահովումը։ Ավստրալիայից Բլինքենը մեկնելու է Ֆիջի։ Վերջին չորս տասնամյակի ընթացքում սա կլինի ԱՄՆ պետքարտուղարի առաջին այցը Խաղաղօվկիանոսյան տարածաշրջանում գտնվող այդ երկիր։

ՄԵԾ ԲՐԻՏԱՆԻԱՅԻ ԱԳ ՆԱԽԱՐԱՐԸ ՄԵԿՆԵԼ Է ՄՈՍԿՎԱ

Մեծ Բրիտանիայի արտաքին քաղաքական գերատեսչության ղեկավար Լիզ Թրասը մեկնել է Մոսկվա՝ բանակցությունների նպատակով: Վերջին չորս տարվա ընթացքում սա բրիտանական արտաքին քաղաքականության պատասխանատուի առաջին այցն է Ռուսաստան: Բրիտանիայի արտգործնախարարության հաղորդագրության մեջ նշված է, որ Լիզ Թրասը մեկնել է Ռուսաստան՝ Մոսկվային դէսկալացիայի կոչ անելու նպատակով:

ՈՒԿՐԱԻՆԱՅՈՒՄ ՊԱՏԵՐԱԶՄԸ ԽԵԼԱԳԱՐՈՒԹՅՈՒՆ ԿԼԻՆԻ. ՀՌՈՄԻ ՊԱՊ

Ուկրաինայում պատերազմը «խելագարություն» կլինի` նշել է Հռոմի Պապ Ֆրանցիսկոսը՝ Վատիկանում հավատացյալների հետ հանդիպման ժամանակ: Պոնտիֆիկոսը հույս է հայտնել, որ Կիևի և Մոսկվայի միջև լարվածությունը կհաղթահարվի բազմակողմ երկխոսության միջոցով, մասնավորապես՝ «նորմանդական ձևաչափի» շնորհիվ։ Ֆրանցիսկոսը Պապը նաև շնորհակալություն է հայտնել նրանց, ովքեր մասնակցել են հունվարի 26-ին Ուկրաինայում խաղաղության համար միջազգային աղոթքին:

ԻՍՐԱՅԵԼԻ ԶԻՆՈՒԺԸ ՀԱՐՎԱԾՆԵՐ Է ՀԱՍՑՐԵԼ ՍԻՐԻԱՅԻՆ

Իսրայելական զինուժը հարվածել է Սիրիայում տեղակայված տեղորոշիչ կայաններին և հակաօդային կայանքներին՝ ի պատասխան Իսրայելի ուղղությամբ զենիթահրթիռային արձակման: Իսրայելի բանակի մամուլի ծառայությունից նշել են, որ չորեքշաբթի գիշերը «Սիրիայի տարածքից զենիթային հրթիռ է արձակվել, որը պայթել է Իսրայելի օդային տարածքում»։ Արդյունքում, ըստ զինվորականների, «օդային ռմբակոծման ազդանշաններ են հնչել Ում ալ Ֆահմ քաղաքում և Արևմտյան ափի հյուսիսում»: Սիրիական SANA լրատվական գործակալությունն էլ հայտնել է, որ մեկ սիրիացի զինվոր է զոհվել, ևս 5-ը վիրավորվել են Դամասկոսի ուղղությամբ իսրայելական օդային հարվածների հետևանքով: Հարձակմանն ի պատասխան՝ սիրիական ՀՕՊ համակարգերը կրակ են բացել մայրաքաղաքի վրա ուղղված օդային թիրախների ուղղությամբ։
 

ՌԴ ԶՈՒ-Ն ԽՈՇՈՐ ԶՈՐԱՎԱՐԺՈՒԹՅՈՒՆՆԵՐ Է ԱՆՑԿԱՑՆՈՒՄ

Ռուսական բանակը խոշոր զորավարժություններ է անցկացնում Հարավային ռազմական շրջանում և Բելառուսում, ինչպես նաև պատրաստվում է զորավարժություններ սկսել Միջերկրական և Սև ծովերում։ Այս ամենը տեղի է ունենում Ուկրաինայի և արևմտյան երկրների հետ հարաբերություններում ճգնաժամի ֆոնին: Ռուսաստանի հարավում զորավարժություններ են անցկացվում Ռուսաստանի ութ շրջանի 15 զորավարժարանում, ինչպես նաև Աբխազիայում և Հարավային Օսիայում։ Ծովային հետևակի զորավարժություններ են տեղի ունենում Ղրիմում: Բելառուսում էլ շարունակվում են «Դաշնակցային վճռականություն-2022» լայնածավալ զորավարժությունները։ Առայժմ դրանք զորքերի տեղակայման փուլում են, փետրվարի 10-ին կսկսվի ակտիվ փուլը։ Բացի այդ, հունվարի 20-ից մի շարք խոշոր զորավարժություններ են իրականացվում Ռուսաստանի ռազմածովային ուժերի չորս նավատորմում: Ռուսաստանի պաշտպանության նախարարությունից հայտնել են, որ դրանց մասնակցում են 140 նավ, ինչպես նաև ավելի քան 10 հազար զինվորական։