Գեղարքունիքի մարզպետն ընդունել է ՀՀ-ում Նիդեռլանդներին դեսպան Նիկո Սխերմերսին

Դեսպան Նիկո Սխերմերսը զրույցն սկսել է հայերենով․ «Հարգարժան մարզպետ, ուրախ եմ ծանոթանալ Ձեզ հետ, ուրախ եմ քննարկել հայ-նիդեռլանդական հարաբերությունները, խոսել դեսպանատան նախագծերի մասին։ Մեր դեսպանատունն իրականացնում է ծրագրեր մի շարք ուղղություններով, եթե լինեն առաջարկներ, կարող ենք քննարկել»,- նշել է դեսպանն ու հետաքրքրվել Գեղարքունիքի մարզի սահմաններին տիրող իրավիճակով, մարզում կայանալիք ՏԻՄ ընտրություններին առնչվող հարցերով, մարզի տուրիստական գրավչություններով, գյուղատնտեսության, բիզնեսի զարգացման, զբոսաշրջության և այլ ոլորտներում համագործակցության հաստատման հեռանկարներով։

Ինչպես նշել է մարզպետ Կարեն Սարգսյանը, այս տարվա մայիսի 12-ից ադրբեջանական զինուժի ապօրինի ներկայությունը Հայաստանի Հանրապետության Գեղարքունիքի մարզի սահմանամերձ համայնքների բնակչությանը խանգարում է գյուղատնտեսական աշխատանքների կազմակերպմանը, անասնակերի հավաքին, վարուցանքին։

 

«Օրեր առաջ մեր մարզի սահմաններում մարտական հերթապահության ընթացքում հակառակորդի կրակոցից զոհվել է մեր ժամկետային զինծառայողը»,- ներկայացրել է մարզպետը և հույս հայնել, որ նիդեռլանդական կողմն այսուհետ էլ շարունակելու է նպաստել դիվանագիտական ճանապարհով հարցի կարգավորմանը։

Դեսպանը նշել է, որ դիվանագիտական լծակներով Ադրբեջանին կոչ է արվել անհապաղ վերադարձնել գերեվարված անձանց և դադարեցնել ոտնձգությունները Հայաստանի սուվերեն տարածքի նկատմամբ։

 

Դեսպանը միաժամանակ տեղեկացրել է, որ Նիդեռլանդների դեսպանատան կողմից մի հետաքրքիր ծրագիր է իրականացվում Հայաստանի Հանրապետությունում, այդ թվում՝ Գեղարքունիքի մարզի Սևան քաղաքի «Նավասարդ Ագրո» թռչնաֆաբրիկայում։

 

«Համաձայն այդ ծրագրի՝ գյուղատնտեսության, փոքր և միջին բիզնեսի ոլորտներում աշխատանքի են ընդգրկվում տարեց մասնագետները՝ անվճար կարգով մասնագիտական խորհրդատվություն իրականացնելու համար։ Ձեռնարկատերերը հոգալու են միայն սննդի և գիշերակացի կարիքները։ Կարծում եմ, որ դա նկատելի օժանդակություն կլինի ձեռնարկատերերին։ Ունենք նաև այլ ծրագրեր, որոնց մասին կխոսենք համապատասխան առաջարկություն ստանալու դեպքում»,- նշել է Նիկո Սխերմերսը։

Այս մասով պայմանավորվածություն է ձեռք բերվել մարզի համար շահավետ ծրագրերն առաջիկայում ներկայացնել գրավոր կերպով և համատեղ ուժերով խթանել սոցիալ-տնտեսական ներուժի զարգացմանը։

Անդրադառնալով այս տարվա դեկտեմբերի 5-ին կայանալիք ՏԻՄ ընտրությունների ընթացքին՝ մարզպետը շեշտել է, որ քարոզարշավն ու մյուս գործընթացներն ընթանում են առանց ավելորդ միջադեպերի և լարվածության, բացառապես օրենքի շրջանակներում։

 

«Համայնքների խոշորացումը նպաստելու է մեր բոլոր բնակավայրերի համաչափ զարգացմանը, սոցիալ-տնտեսական զարգացման ծրագրերի ներդրմանը, տեղական ինքնակառավարման կատարելագործմանն ու ուժեղացմանը։ Նոր պայմաններում մենք ծրագրերի իրականացման ավելի հստակ առաջարկներ կներկայացնենք, մեր մարզի տարածքում կաջակցենք բոլոր համատեղ ծրագրերի իրականացմանը»,- ասել է Կարեն Սարգսյանը։

Մարզպետը քաջատեղյակ լինելով դեսպանի նախասիրությանը՝ քայլարշավների և Հայաստանի տեսարժան վայրերի բացահայտման հանդեպ հետաքրքրվածությանը, առաջարկել է 2022 թվականի գարնանը միասին քայլարշավ կազմակերպել դեպի Արմաղան լեռ, որը գտնվում է Սևանա լճից հարավ-արևմուտք, Արգիճի գետահովտից հյուսիս, Գեղամա և Վարդենիսի լեռնաշղթաների սահմանագլխին։