Եթե մենք սկսենք քննարկել անվտանգության ճարտարապետության վերաբերյալ Ռուսաստանի պահանջները, ապա կընկնենք նրա դրած ծուղակը՝ հայտարարել է ԵՄ դիվանագիտության ղեկավար Կայա Կալասը՝ անդրադառնալով վերջին օրերին Ռուսաստանի, Ուկրաինայի և ԱՄՆ-ի միջև ընթացող եռակողմ բանակցություններին։
«Մեր ուշադրությունը կշեղվի այն փաստից, որ հրադադար չկա, և դրա փոխարեն կսկսենք լսել Ռուսաստանի հավակնությունները։ Եկեք կենտրոնանանք այն բանի վրա, թե ինչ է կատարվում հիմա: Մենք ունենք մեկ ագրեսոր և մեկ զոհ, և ագրեսորը անվտանգության ոլորտում որևէ մտավախություն չունի»,- հայտարարել է Կալասը։
ՌԴ նախագահի մամուլի քարտուղար Դմիտրի Պեսկովն էլ նշել է, որ Մոսկվան պատրաստ է խոսել եվրոպական կողմի հետ։
«Երբ մենք հասկանանք նրանց իրական մտադրություններն ու խաղաղ գործընթացին նպաստելու պատրաստակամությունը, այդ ժամանակ արդեն հնարավոր կլինի որոշում կայացնել Ուկրաինական կարգավորման շուրջ ընդլայնված ձևաչափով երկխոսություն անցկացնելու մասին»,- ասել է Կրեմլի խոսնակը:
Պեսկովը նաև հայտնել է, որ Ռուսաստանի, ԱՄՆ-ի և Ուկրաինայի բանակցությունների հաջորդ փուլը տեղի կունենա մոտ ժամանակներս: Նա հստակեցրել է, որ բանակցություններում ՌԴ նախագահի օգնական Վլադիմիր Մեդինսկու պատվիրակության կազմը փոխելու անհրաժեշտություն առայժմ չկա:
