«Silicon Mountains Summit & Expo 2026» միջազգային համաժողովի շրջանակում նոյեմբերի 3-ին տեղի է ունեցել 21-րդ Միկրոէլեկտրոնիկայի ամենամյա միջազգային օլիմպիադայի մրցանակների հանձնման հանդիսավոր արարողությունը։ Միջոցառմանը մասնակցել է ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը, ով մրցանակներ է հանձնել օլիմպիադայի հաղթողներին։
Այս տարի օլիմպիադայի եզրափակիչ փուլին մասնակցել են 15 երկրների՝ Արգենտինայի, Բրազիլիայի, Եգիպտոսի, Էստոնիայի, Լեհաստանի, Լիբանանի, Հայաստանի, Հնդկաստանի, Հորդանանի, Շրի Լանկայի, Պերուի, Ռուանդայի, Ռուսաստանի, Վիետնամի և Ֆրանսիայի ազգային օլիմպիադաների հաղթողները։
Մրցույթի արդյունքներով մրցանակային տեղեր են զբաղեցրել՝
Առաջին մրցանակ՝ Լիանա Խաչատրյան (Հայաստան),
Երկրորդ մրցանակ՝ Ասան Նդիայե (Ֆրանսիա),
Երրորդ մրցանակներ՝ Նաթալի Ջուլջյան (Լիբանան), Արթուր Սարիբեկյան (Հայաստան), Անտոն Գլինին (Ռուսաստան)։
«Լավագույն ճարտարագիտական լուծում» հատուկ մրցանակը, որը նվիրված է պատերազմի ընթացքում զոհված Արման Ճաղարյանի հիշատակին, շնորհվել է Հայկուշ Պետրոսյանին (Հայաստան)։
Օլիմպիադայի բոլոր մասնակիցները ստացել են մասնակցության հավաստագրեր և հուշամեդալներ։
Միկրոէլեկտրոնիկայի ամենամյա միջազգային օլիմպիադան գիտելիքահեն, երկու փուլով անցկացվող գրավոր մրցույթ է, որի նպատակն է բացահայտել և խրախուսել միկրոէլեկտրոնիկայի ոլորտում բարձր գիտելիքներ և մասնագիտական կարողություններ ունեցող երիտասարդ մասնագետներին։ Օլիմպիադային կարող են մասնակցել մինչև 30 տարեկան ճարտարագետներն ու ուսանողները։
Մրցույթի առաջին փուլն անցկացվում է մասնակից երկրներում՝ տեղական կազմակերպչական կոմիտեների կողմից, իսկ ազգային փուլերի հաղթողները հրավիրվում են Հայաստան՝ մասնակցելու եզրափակիչ փուլին։
Միկրոէլեկտրոնիկայի ամենամյա միջազգային օլիմպիադան անցկացվում է «Սինոփսիս Արմենիա» ընկերության նախաձեռնությամբ՝ ՀՀ վարչապետի հովանու ներքո և կարևոր հարթակ է՝ խթանելու միջազգային մասնագիտական համագործակցությունը, բացահայտելու երիտասարդ տաղանդներին և նպաստելու միկրոէլեկտրոնիկայի ոլորտի զարգացմանը։
Օլիմպիադայի հովանավորներն են ՀՀ բարձր տեխնոլոգիական արդյունաբերության և արհեստական բանականության նախարարությունը, ՏՀՏ գործատուների միությունը, «Վիասֆեր Տեխնոպարկը» և Ձեռնարկությունների ինկուբատոր հիմնադրամը։
Գլխավոր հովանավորն է «ՅՈՒՔՈՄ» ՓԲԸ-ն, գլխավոր գործընկերը՝ «ՅՈՒՆԻՔՈՄՓ» ՓԲԸ-ն, իսկ գլխավոր աջակիցը՝ ԱԿԲԱ բանկը։
Միջոցառումն իրականացվում է «Հայաստան» համահայկական հիմնադրամի աջակցությամբ և IEEE միջազգային մասնագիտական կառույցի՝ Էլեկտրոնային և էլեկտրիկայի ճարտարագետների ինստիտուտի Թեստային տեխնոլոգիաների տեխնիկական խորհրդի (IEEE TTTC) հետ համագործակցությամբ։