Կրեմլի խոսնակ Դմիտրի Պեսկովը տեղեկացրել է, որ աշխատանքներ են տարվում Ռուսաստանի, Չինաստանի և ԱՄՆ նախագահների մասնակցությամբ եռակողմ հանդիպում կազմակերպելու ուղղությամբ։ Ակնկալվում է, որ բանակցությունները տեղի կունենան Ասիա-խաղաղօվկիանոսյան տնտեսական համագործակցության գագաթնաժողովի շրջանակում, որն անցկացվելու է Չինաստանում՝ նոյեմբերի 18–19-ը։
«Ռուսաստանը, Միացյալ Նահանգները և Չինաստանն ունեն ընդհանուր ընկալում, որ երեք երկրների ղեկավարների հանդիպումը նպատակահարմար և չափազանց օգտակար կլինի»,– շեշտել է Կրեմլի խոսնակը։
Պեկինը դեռևս չի հաստատել նման հանդիպման կազմակերպումը։ Ավելի վաղ Դոնալդ Թրամփը կարևոր էր համարել, որ երեք երկրների ղեկավարները բանակցեն՝ քննարկելու զինատեսակների վերահսկման և այլ հարցեր։
Դմիտրի Պեսկովը նաև հաստատել է, որ նոյեմբերի 10–11-ը ռուսական պատվիրակությունը կգտնվի Աբու Դաբիում՝ մասնակցելու Ուկրաինայի հարցով բանակցություններին, որոնց, բացի Կիևի թիմից, ներկա է լինելու նաև ամերիկյան կողմը։ Կրեմլի խոսնակը հավելել է, որ Մոսկվայի գլխավոր բանակցողը կրկին լինելու է նախագահի օգնական Վլադիմիր Մեդինսկին։
