Միլանի գլխավոր օդանավակայանը՝ Մալպենզան, հանդիսավոր կերպով վերանվանվել է քաղաքական գործիչ և մեդիա մագնատ Սիլվիո Բեռլուսկոնիի հիշատակին՝ չնայած քաղաքային խորհրդի և իշխանությունների մյուս մարմինների դիմադրությանը, հաղորդում է EFE-ն։
Այժմ Հյուսիսային Իտալիայի գլխավոր օդանավակայանը կկոչվի Սիլվիո Բեռլուսկոնիի անվան Միլանի Մալպենզայի միջազգային օդանավակայան։
Նոր անունը կրող հուշատախտակի բացման արարողությանը ներկա էին նախկին վարչապետի հարազատները, աջակողմյան քաղաքական գործիչներ, ինչպիսիք են Սենատի նախագահ Ինյացիո Լա Ռուսան և արտաքին գործերի նախարար Անտոնիո Տայանին՝ Բեռլուսկոնիի իրավահաջորդը «Առաջ, Իտալիա» կուսակցության առաջնորդի պաշտոնում:
Լոմբարդիայի տարածաշրջանային կառավարությունը դեռևս 2024 թվականի հունիսին էր առաջարկել օդանավակայանն անվանակոչել Բեռլուսկոնիի անունով։ Միլանի և Վարեզեի քաղաքապետները, սակայն, դեմ էին նախաձեռնությանը և չեն մասնակցել արարողությանը։
Մինլանում ծնված Բեռլուսկոնին Իտալիայի վարչապետի պաշտոնը զբաղեցրել է չորս անգամ՝ 1994-1995, 2001-2005, 2005-2006 և 2008-2011 թվականներին՝ դառնալով ռեկորդակիր այդ պաշտոնում:
