ՄԱԿ-ի Գլխավոր ասամբլեայի 81-րդ նստաշրջանի շրջանակում կայացած բարձր մակարդակի քննարկման ընթացքում ՀՀ առողջապահության նախարար Անահիտ Ավանեսյանը մասնակցել է Հայաստանի, Ռուանդայի և Համավարակների հիմնադրամի կողմից կազմակերպված «Պատրաստ հաջորդին. ինչպես են ազգային ներդրումները հզորացնում գլոբալ առողջապահական դիմակայունությունը» խորագրով միջոցառմանը: Այս մասին տեղեկացնում են ՀՀ առողջապահության նախարարությունից:
Նախարարն անդրադարձել է համավարակների կանխարգելման, պատրաստվածության և արձագանքման ուղղությամբ երկրների ներդրումներին և միջազգային համագործակցության կարևորությանը։
«Պատրաստվածությունը չի կարող սկսվել այն ժամանակ, երբ արտակարգ իրավիճակն արդեն վրա է հասել։ Այն պահանջում է շարունակական ջանքեր՝ ուժեղ և դիմակայուն առողջապահական համակարգերի ձևավորման, արդյունավետ կանխարգելման ռազմավարությունների և համաճարակաբանական հսկողության կարողությունների զարգացման ուղղությամբ: Այստեղ կարևոր են համապատասխան միջոցներով առողջապահական ներուժի ձևավորման, ինչպես նաև համակարգի ծանրաբեռնվածության պայմաններում առողջապահական ծառայությունների անխափան մատուցմանն ուղղված քայլերը»,- նշել է նախարարը:
Քննարկման առանցքում են եղել հավասարության, համերաշխության և միջազգային համագործակցության կարևորությունը, ինչպես նաև քաղաքական և ֆինանսական հանձնառությունները գործնական, չափելի արդյունքների վերածելու անհրաժեշտությունը։
