Խորհրդարանը քննարկում է ԱԺ պատգամավորներ Վանիկ Օհանյանի և Լուսինե Բադալյանի ներկայացրած՝ «Դեղերի մասին» օրենքում լրացում և փոփոխություն կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին օրենքների նախագծերի փաթեթն առաջին ընթերցմամբ ընդունելու մասին հարցը:
Օհանյանի խոսքով՝ նախագծի փաթեթով ցանկանում են կանոնակարգել կեղծ և ժամկետանց դեղերի ոչնչացման գործընթացը, պատշաճ վերահսկողություն սահմանել ոչնչացման գործընթացի նկատմամբ:
«Վերահսկողական գործիքակազմի բացակայությունը հնարավորություն չի տալիս տեսչական մարմնին հավաստիանալու դեղերի ոչնչացման ամբողջական իրավիճակի վերաբերյալ, այսինքն՝ փաստաթղթային ձևակերպումից հետո հնարավոր ռիսկեր են եղել, և եղել են նախադեպեր, որ դեղերը հայտնվել են շուկայում ու իրացվել, որպեսզի բացառվեն նմանատիպ դեպքերը»,- հայտնեց նա՝ տեղեկացնելով, որ նախագծերի փաթեթը բավականաչափ քննարկվել է առողջապահության նախարարության, աշխատանքի և առողջապահության տեսչական մարմնի և ՇՄ նախարարության գործընկերների հետ:
«Ունենք նրանց դրական կարծիքները: Մեզ ներկայացվել է նաև կառավարության հավաքական կարծիքը նոր առաջարկությունների տեսքով, որոնք բոլորն ընդունելի են եղել մեզ համար, կատարվել են համապատասխան փոփոխություններ և ներկայացրել ենք առաջարկությունների ամփոփաթերթիկի տեսքով: Առաջարկում եմ այս տեսքով ընդունել նախագիծն առաջին ընթերցմամբ, և պատրաստ ենք լսել բոլոր առաջարկները մինչև երկրորդ ընթերցում»,- հայտնեց պատգամավորը:
