Բելառուսի մայրաքաղաք Մինսկում կայացել է «Հայ մարտիկները Բելառուսի ազատագրման մարտերում (1941-1944)» գիտական հրատարակության շնորհանդեսը: Այս մասին գրում է Беларусь сегодня պարբերականը:
«Առաջին անգամ գրքում մեկտեղված են Բելառուսի տարածքում զոհված, անհայտ կորած և հուղարկավորված 3429 հայ ռազմիկների մասին կենսագրական տեղեկագրերը։ Առանձնացվել է Բրեստի ամրոցի պաշտպան հայերի ցուցակը: Դրանում կա 101 անուն»,- նշված է հրապարակման մեջ:
Գրքում տեղ են գտել Բելառուսում ռազմական սխրանքների և արժանիքների համար պարգևատրված ավելի քան երկու հազար հայերի պատվոգրերից հատվածներ, 30 ականավոր հրամանատարների մասին կենսագրական ակնարկներ, ԽՍՀՄ 15 հերոսների, հայկական ծագմամբ Փառքի հայ շքանշանակիրների մասին պատմություններ:
Հրատարակված են նաև առանձին ակնարկներ Վորոշիլովի անվան 51-րդ գվարդիական հրաձգային դիվիզիայի, ինչպես նաև «Սասունցի Դավիթ» տանկային շարասյան պատմության մասին, որոնք 1944 թվականի ամռանը մասնակցել են Բելառուսի ազատագրմանը:
Հաղորդվում է, որ նախագծի ղեկավարը Հայագիտական հետազոտությունների զարգացման և աջակցության «ԱՆԻՎ» հիմնադրամի գլխավոր տնօրեն Արմեն Խեչոյանն է:
