Շվեդիայի արտաքին առևտրի և միջազգային զարգացման համագործակցության նախարար Բենջամին Դուսան այն կարծիքին է, որ ԱՄՆ-ն կարող է Եվրամիությանը ներքաշել առևտրային պատերազմի մեջ: Այդ մասին նա հայտնել է Բրյուսելում գործընկերների հետ հանդիպումից առաջ։
Դուսան կարծիք է հայտնել, որ ԵՄ-ն ԱՄՆ-ի հետ առևտրային բանակցություններ է վարել «խաղի բոլոր կանոններին համապատասխան» և դեռևս չի բարձրացրել ամերիկյան ապրանքների ներմուծման համար որևէ մաքսատուրք։ «Ես մի փոքր զարմացած եմ, որ Սպիտակ տունը որոշեց սրել իրավիճակը, երբ մենք այդքան մոտ էինք վերջնագծին»,- ասել է նա։
Նախարարը զգուշացրել է, որ Բրյուսելը պետք է պատրաստվի վատագույնին։ «Սպիտակ տնից ամեն ժամ և ամեն օր նոր հաղորդագրություններ են ստացվում, ուստի դժվար է կռահել, թե նրանք կոնկրետ ինչ են մտածում։ Բայց մենք պետք է պատրաստվենք վատագույնին», - բացատրել է Դուսան։
Նախագահ Դոնալդ Թրամփը իր Truth Social էջում հրապարակել է նամակ՝ ուղղված Եվրահանձնաժողովին (ԵՀ), որում նշվում է, որ օգոստոսի 1-ից «30 տոկոս մաքսատուրք կսահմանվի Միացյալ Նահանգներ ներկրվող Եվրամիության ապրանքների վրա»։ Նոր մաքսատուրքերը սահմանվում են «ոլորտային տուրքերից առանձին», որոնք կազմում են 10%։ Որոշումը կայացվել է, երբ խոշոր առևտրային դաշնակիցների հետ շաբաթներ շարունակ տևած բանակցությունները չեն հանգեցրել ավելի լայն առևտրային համաձայնագրի։
