Դիվանագիտական խողովակով խորհրդակցություն ենք իրականացնում Ադրբեջանի հետ, որպեսզի խաղաղության պայմանագիրը ստորագրվի: Այս մասին լրագրողների հետ ճեպազրույցում ասաց ՀՀ ԱԽ քարտուղար Արմեն Գրիգորյանը:
Անդրադառնալով Խոզնավարի հատվածում կրակոցներին՝ ԱԽ քարտուղարը հիշեցրեց, որ Հայաստանն Արդբեջանին առաջարկել է սահմանային միջադեպերի հետաքննության մեխանիզմ ստեղծել:
«Շարունակում ենք Ադրբեջանի հետ քննարկել, որպեսզի հետաքննության մեխանիզմը ստեղծենք»,- ասաց Գրիգորյանը:
ԱԽ քարտուղարի խոսքով՝ խաղաղության կառուցման գործընթացում առաջընթաց են ունեցել:
«Սահմանազատման արդյունքում հիմա ունենք 12.7 կմ սահմանազատված հատված, հավելյալ սահմանային գիծ, որի երկու կողմերում էլ սահմանապահ զորքեր կան»,- նշեց ԱԽ քարտուղարը:
Ըստ Գրիգորյանի՝ փոխվարչապետների մակարդակով աշխատանքային խմբերը շարունակում են աշխատել, որպեսզի սահմանազատման գործընթացի հետ կապված առաջ ընթանան:
«Վերջին պայմանավորածությունն այն է, որ Հայաստան-Վրաստան-Ադրբեջան սահմանակետից շարունակվելու է սահմանազատման գործընթացը, փորձում են բանակցությունների միջոցով հասնել լուծումների, որպեսզի շարունակվի սահմանազատման գործընթացը»,- ասաց նա:
Ավելի վաղ հայտնել էինք՝ մայիսի 29-ին՝ ժամը 01:00-01:15-ն ընկած ժամանակահատվածում, Ադրբեջանի ԶՈՒ ստորաբաժանումները կրակ էին բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել էր բնակելի տուն։
ՀՀ ՊՆ-ից հայտնել էին՝ տուժածներ չկան:
