Rusiyalı mütəxəssislər Azərbaycana zirehli tank texnikasının təmiri və texniki xidməti üçün nəzərdə tutulan infrastruktur obyektlərinin tikintisində və modernləşdirilməsində dəstək göstərəcəklər. Bu barədə Rusiyanın Hərbi-Texniki Əməkdaşlıq üzrə Federal Xidmətinin direktoru Dmitri Şuqayev məlumat verib. Onun sözlərinə görə, tərəflər arasında artıq hərtərəfli saziş imzalanıb.
O, həmçinin azərbaycanlı tərəfdaşların Rusiyanın “Pantsir-S1” zenit-raket-top komplekslərinə böyük maraq göstərdiyini vurğulayıb. Şuqayev qeyd edib ki, bu hava hücumundan müdafiə sistemlərinə böyük tələbat var və yaxın perspektivdə onların Azərbaycana tədarükünə dair müqavilələrin imzalanması mümkündür.
