İran hələ də ABŞ-nin vitse-prezidenti Cey Di Vensin İranın Ali Milli Təhlükəsizlik Şurasının katibi Möhsün Rezaiyə ünvanladığı məktuba cavab verməyib. Bu barədə Tasnim məlumat yayıb.
Agentliyin məlumatına görə, Tehran Vaşinqtonun İranın yeddi şərtini yerinə yetirməsində israr edir və İranın bu qəti mövqeyinə zidd olan istənilən mövqe qəbuledilməzdir.
The Wall Street Journal isə yazır ki, Vens İranın Milli Təhlükəsizlik Şurasının katibinə məktub göndərməklə İslam Respublikası ilə danışıqları bərpa etməyə çalışır.
ABŞ-nin vitse-prezidenti məktubda İran rəhbərliyinə ölkənin nüvə proqramını Vaşinqtonla müzakirə etmək səlahiyyətinə malik nümayəndələr seçməyi təklif edib. Bu barədə WP amerikalı məmura istinadən məlumat verir.
Həmin məmurun sözlərinə görə, Vens İranın nüvə silahına malik olmamalı olduğunu vurğulayıb. Eyni zamanda, o, danışıqlarda həm ABŞ-nin, həm də İranın milli maraqlarına üstünlük verilməli olduğunu, sanksiyalar və hərbi əməliyyatlar nəticəsində zərər çəkmiş iqtisadiyyatın bərpasının, eləcə də ölkənin suverenliyinin qorunmasının Tehranın maraqlarına uyğun olduğunu dəqiqləşdirib.
ABŞ-nin vitse-prezidenti Vens əmindir ki, ABŞ–İran münaqişəsi daha bir "əbədi müharibə"yə çevrilməyəcək.
WP-nin mənbəyi əlavə edib ki, danışıqlar bərpa olunarsa, böyük ehtimalla ya İslamabadda, ya da Dohada keçiriləcək.
