Bu gecə Ukrayna qüvvələri pilotsuz uçuş aparatları ilə Samara vilayətinin Tolyatti şəhərinə zərbələr endirib. KİV-lərin məlumatına görə, "Kuybışevazot" və "Tolyattikauçuk" iri neft-kimya müəssisələri yanıb.
Vilayət rəhbərliyi zavoda hücumu təsdiqləməyib. Samara vilayətinin qubernatoru Vyaçeslav Fedorışev səhər saatlarında bildirib ki, hərbi və mobil atəş qrupları Ukrayna Silahlı Qüvvələrinin regiona hücumunu dəf edir. O, başqa təfərrüatlar verməyib.
Tolyattinin mərkəzi rayonunda elektrik enerjisi və su təchizatında da fasilələr olduğu bildirilir.
Rostov vilayətinin qubernatoru Yuri Slyusar bəyan edib ki, region üzərində 80-dən çox dron məhv edilib. Onların qalıqları "Rostovpasajirtrans" filialının damına düşüb, 21 avtobusa ziyan dəyib. Transformator yarımstansiyası da zədələnib, 172 fərdi ev elektriksiz qalıb.
Rusiya Müdafiə Nazirliyi də bildirib ki, gecə ərzində RF bölgələrinin və Krımın səmasında 616 Ukrayna pilotsuz uçuş aparatı vurulub.
KİV-də həmçinin Ukrayna Silahlı Qüvvələrinin Moskvadan Novozıbkova gedən sərnişin avtobusuna hücum etdiyi, bir nəfərin həlak olduğu, daha üç nəfərin isə müxtəlif dərəcəli xəsarətlər aldığı barədə məlumat yayılır.
