Rusiya TRIPP layihəsində Moskvanın mümkün iştirakının parametrlərini Yerevanla müzakirə etməyə hazırdır: Qaluzin
Rusiya xarici işlər nazirinin müavini Mixail Qaluzin bildirib ki, Rusiya Moskvanın TRIPP layihəsində mümkün iştirakının parametrlərini Yerevanla müzakirə etməyə hazırdır.
"Biz artıq Trampın yolu ilə bağlı mövqeyimizi müəyyən etmişik. Ermənistan-Amerika təşəbbüsünün detalları hələ də öyrənilməlidir", - deyə diplomat əlavə edib.
Qaluzin xatırladıb ki, Ermənistanın dəmir yolu şəbəkəsi 2038-ci ilə qədər Rusiya Dəmir Yollarının törəmə şirkəti tərəfindən idarə olunacaq, ölkə Rusiya dəmir yolu xəttindən istifadə edir və Rusiya sərhədçiləri İranla sərhəddə yerləşdirilib.
"Ermənistanın AİB-ə üzvlüyünü də nəzərə almaq lazımdır. Bu şəraitdə tərəfdaşlarımızın Rusiyasız keçinə bilməyəcəyi göz qabağındadır", - nazir müavini bildirib.
