Ermənistanın Almaniyadakı səfiri Viktor Yengibaryan ilə Bundestaqın Xarici Əlaqələr Komitəsinin sədri Armin Laşet arasında görüş baş tutub. Söhbətin əsas mövzusu Ermənistanla Azərbaycan arasında imzalanmış sülh və dövlətlərarası münasibətlərin qurulması haqqında saziş olub. Bu barədə Ermənistan Respublikasının Almaniyadakı səfirliyi məlumat yayıb.
Xüsusilə Armin Laşet qeyd edib: “Yaxşı ki, iki ölkə sülh və münasibətlərin normallaşdırılması yolunu seçiblər. Sülh sazişi Sovet İttifaqının dağılması ilə başlayan, demək olar ki, qırx il davam edən münaqişəyə son qoyur.
Ermənistan və Azərbaycan hökumətləri bu addımdan regionda insanların əzab-əziyyətinə son qoymaq və daha yaxşı gələcəyə ümid yaratmaq üçün istifadə ediblər. Müqavilə həmçinin bütün Qafqaz regionunun sabitləşməsinə töhfə verir və Avropa ilə Mərkəzi Asiya arasında yeni yollar açır. Almaniya hər iki tərəfdən sülh və barışıq prosesini dəstəkləməyə davam edəcək”.
Ermənistan səfiri də öz növbəsində qeyd edib ki, Vaşinqtonda əldə olunan razılaşmalar həm region ölkələri, həm də Avropa İttifaqı üçün faydalıdır. Səfir Yengibaryan əlavə edib: “Oyun qaydaları dəyişib, münaqişə məntiqi hərtərəfli əməkdaşlıq məntiqi ilə əvəz olunacaq və bu əməkdaşlıqdan hamı faydalanacaq”.
Həmsöhbətlər Ermənistan və Almaniya arasında ikitərəfli əməkdaşlıq məsələlərini də müzakirə ediblər.
