Հայաստանը մշտապես կարևոր է համարել Իտալիայի հետ գործակցությունն ու հարաբերությունների խորացումը, ասել է Հայաստանի գլխավոր դատախազ Աննա Վարդապետյանը` դատախազության հիմնադրման 105-ամյակի միջոցառմանը և Եվրոպայի խորհրդի գրասենյակի հետ կազմակերպվող համաժողովին մասնակցելու նպատակով Հայաստան ժամանած Իտալիայի գերագույն վճռաբեկ դատարանի գլխավոր դատախազ Լուիջի Սալվատոյի գլխավորած պատվիրակության հետ հանդիպմանը:
Ստորագրվել է փոխըմբռնման հուշագիր՝ քրեական արդարադատության ոլորտում երկու երկրների դատախազությունների միջև գործակցությունն ընդլայնելու համար:
Գլխավոր դատախազն ընդունել է նաև Էստոնիայի գլխավոր դատախազ Անդրես Պարմասի գլխավորած պատվիրակությանը: Ընդգծել է, որ Հայաստանը կարևոր է համարում Էստոնիայի հետ հարաբերությունների խորացումը, այդ թվում` իրավական ոլորտում: Հաշվի առնելով Էստոնիայի դատական իշխանության պարբերականի գլխավոր խմբագրի փորձառությունը՝ Վարդապետյանը նրան առաջարկել է ընդգրկվել Հայաստանի դատախազության «Օրինականություն» գիտագործնական պարբերականի խմբագրական խորհրդի կազմում:
«1994 թվականին՝ Հայաստանի և Խորվաթիայի միջև դիվանագիտական կապերի հաստատումից հետո, մեր երկրների հարաբերությունները նոր ընթացք են ստացել: Կնքվել են համաձայնագրեր՝ տարբեր ոլորտներում երկու երկրների գործակցության հետագա զարգացման ուղղությամբ: Բացառություն չի կազմում նաև իրավական ոլորտը»,- նշել է Հայաստանի գլխավոր դատախազը Խորվաթիայի գլխավոր պետական դատախազի տեղակալ Էմիլիո Կալաբրիչի գլխավորած պատվիրակության հետ հանդիպմանը:
«2021 թվականի մարտից Հայաստանին հնարավորություն է ընձեռվել դիտարկել Եվրա-ջասթին միանալու հարցը: 2022 թվականից Հայաստանը բանակցություններ է սկսել ԵՄ-ի հետ՝ քրեական գործերով դատական գործակցության մասին համաձայնագրի նախագծի շուրջ»,- ընդգծել է ՀՀ գլխավոր դատախազը՝ Եվրոպական միության քրեական արդարադատության գործակալության փոխնախագահ Բոշտյան Շկռլեցի հետ հանդիպմանը:
Հայաստանում է նաև Դատախազների միջազգային ասոցիացիայի փոխնախագահ Գիորգի Գոգաձեն: Աննա Վարդապետյանը կարևոր է համարել սպասվող համաժողովին նրա ներկայությունը և ընդգծել հանցավորության դեմ պայքարի համընդհանուր գերնպատակի իրականացման ուղղությամբ ջանքերի միավորման անհրաժեշտությունը:
Լիտվայի գլխավոր դատախազ Նիդա Գրունսկիենեյի հետ Աննա Վարդապետյանը ստորագրել է փոխըմբռնման հուշագիր, որի նպատակն է ընդլայնել քրեական արդարադատության ոլորտում Հայաստանի և Լիտվայի դատախազությունների միջև գործակցությունը՝ միտված մարդու իրավունքների ու ազատությունների պաշտպանության ապահովմանը և օրենքի գերակայության ամրապնդմանը:
Դատախազության 105-ամյակի միջոցառումը հուլիսի 1-ին է:
