Ոչ թե Երևան, այլ Փարիզ և Բեռլին: Ռուսաստանյան պետական «Ռոսիա 24» հեռուստաալիքը մայիսի 2-ի առավոտյան լուրերի եթերում անդրադարձել է Երևանում ընդդիմության բողոքի ցույցերին, սակայն օգտագործված կադրերը Երևանում անցկացվող ցույցից չեն: Կադրերը վերցված են այս օրերին Փարիզում և Բեռլինում անցկացվող ցույցերից: Օրինակ՝ երեկոյան ժամին ոստիկանների հետ բախման տեսարանը մայիսի 1-ին Բեռլինում անցկացված ցույցից է:
Լիլիթ Մինասյան (ԱԺ «Քաղաքացիական պայմանագիր» խմբակցության անդամ) - Կարծում եմ, որ դա աշխատանքային վրիպակ է և բացարձակ միտում չի ունեցել հայաստանյան ներքաղաքական իրականությունը խեղաթյուրելու, մեր ռուս գործընկերները կդրսևորեն բարձր պրոֆեսիոնալիզմ՝ ուղղելու այդ վրիպակը, քանի որ Հայաստանում ներքաղաքական դաշտում դա շահարկումների ու տարակարծությունների առիթ է տվել:
Ըստ «Ռոսիա 24» հեռուստաալիքի տեսանյութի՝ ոստիկանության և ցուցարարների բախման ժամանակ Հայաստանում կիրառվում են հատուկ միջոցներ, մինչդեռ վերջին օրերին Երևանում անցկացվող ընդդիմության ցույցերի ժամանակ ո՛չ ոստիկանության, ո՛չ էլ ցուցարարների կողմից նման դեպքեր չեն գրանցվել։
Լիլիթ Մինասյան - Հայաստանում 2018-ից այս կողմ արցունքաբեր գազ և ոստիկանական հատուկ գործողություններ չեն իրականացվել:
«Լուրեր»-ը կապ հաստատեց «Ռոսիա 24» հեռուստաալիքի հետ՝ տեղի ունեցածի մասին պարզաբանում ստանալու համար: Հեռուստաընկերության տեղեկատվական կենտրոնից փոխանցեցին.
«Մենք մանրամասներին չեն տիրապետում ձեր հարցի հետ կապված, բայց Ռուսաստանում Հայաստանի դեսպանատունը առավոտյան կապ է հաստատել հեռուստաընկերության հետ, դեսպանատնից կարող եք մանրամասները ճշտել»:
Ռուսաստանում Հայաստանի դեսպանատնից մեզ փոխանցեցին՝ «Ռոսիա 24» հեռուստաընկերությունից բանավոր պատասխանել են, որ տեխնիկական սխալ է եղել: Ի դեպ՝ այդ տեսանյութը որոնողակական համակարգով համացանցում գտնել արդեն չի հաջողվում:
Հեղինակ` Իրինա Մկրտչյան
