ԵՄ 2,6 մլրդ եվրոյի ներդրում, ապաշրջափակում, գերիներ. Տոյվո Կլաարի հայաստանյան հանդիպումների օրակարգը
Վարչապետ Նիկոլ Փաշինյանը Հարավային Կովկասի ու Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի հետ հանդիպմանն ընդգծել է, որ ժողովրդավարական բարեփոխումները Հայաստանի կառավարության առաջնահերթություններից են, և իշխանության նվիրվածությունը դրանց անբեկանելի է:
Քննարկվել են Հայաստանի համար նախատեսված՝ Եվրամիության 2,6 մլրդ եվրոյի ներդրումային փաթեթի իրականացման հարցեր: Հատկապես կարևորվել է Սյունիքի մարզում 80 մլն եվրոյի փաթեթի արդյունավետ կյանքի կոչումը: Վարչապետը բարձր է գնահատել Եվրոպական խորհրդի նախագահ Շառլ Միշելի ջանքերը՝ տարածաշրջանում կայունության ամրապնդման ուղղությամբ:
Անդրադարձ է եղել 44-օրյա պատերազմի հետևանքով Հարավային Կովկասում ստեղծված իրավիճակին, հայ-ադրբեջանական սահմանին լարվածության լիցքաթափմանն ուղղված քայլերին: Կարևորվել է Լեռնային Ղարաբաղի հակամարտության գոտի ՅՈՒՆԵՍԿՕ-ի առաքելության ու միջազգային մարդասիրական կազմակերպությունների մուտքի ապահովումը՝ հաշվի առնելով հայկական մշակութային ժառանգության նկատմամբ Ադրբեջանի սպառնալից հայտարարություններն ու արդեն հայկական որոշ կոթողների ոչնչացմանն ուղղված գործողությունները:
Տոյվո Կլաարի գլխավորած պատվիրակությունը հանդիպել է նաև փոխվարչապետ Մհեր Գրիգորյանի հետ, մտքեր են փոխանակվել տարածաշրջանային զարգացումների, մասնավորապես՝ տրանսպորտային ապաշրջափակման աշխատանքների շուրջ: Մհեր Գրիգորյանը ներկայացրել է հայկական կողմի դիրքորոշումն ու անդրադարձել հնարավոր ապաշրջափակման սկզբունքներին:
Պաշտպանության նախարար Սուրեն Պապիկյանը Կլաարի հետ հանդիպման ժամանակ շնորհակալություն է հայտնել Եվրամիության ղեկավարությանը՝ Ադրբեջանում պահվող հայ ռազմագերիների հայրենադարձման ուղղությամբ գործադրվող ակտիվ ջանքերի համար, ներկայացրել Արցախում և հայ-ադրբեջանական սահմանագոտում տիրող իրավիճակը:
Եվրամիությունը պատրաստ է աջակցել հակամարտության վերջնական կարգավորման ու իրավիճակի կայունացման գործում, նպաստել տարբեր ձևաչափերով բանակցությունների ակտիվացմանը՝ Երևանում հայտարարել է Տոյվո Կլաարը: Նշվել է, որ Եվրոպական միությունը շարունակելու է հումանիտար ոլորտում աշխատանքների իրականացումը, մասնավորապես՝ ռազմագերիների, այլ պահվող անձանց վերադարձի ուղղությամբ:
