Սյունիքի սահմանամերձ համայնքների խնդիրները մարզպետարանը գույքագրում է և լուծում գտնում

Սյունիքի մարզի Կապան քաղաքի սահմանամերձ Ագարակ և Եղվարդ գյուղերի անվտանգության հարցով մարզպետի որոշմամբ ստեղծվել է հանձնաժողով, որի կազմում ներառված պետական կառույցների ներկայացուցիչների աշխատանքը համակարգում է մարզպետի տեղակալ Կարո Ավանեսյանը։

Նրա խոսքով՝ Ագարակ և Եղվարդ գյուղերի խնդիրները բնորոշ են սահմանամերձներին: Այստեղ գլխավորն անվտանգության ապահովումն է և նոր ճանապարհահատվածի նորոգումը:

Կարո Ավանեսյան (Սյունիքի մարզպետի տեղակալ) - Ապահով լինելու համար անասնապահը զենքերը վերցնում է, իր հետ տանում արոտավայր:

ՍՅՈՒՆԻՔՈՒՄ ԽՆԴԻՐՆԵՐԸ ԳՈՒՅՔԱԳՐՎՈՒՄ ԵՆ ԵՎ ԼՈՒԾՎՈՒՄ

Կառավարության որոշմամբ՝ այս տարի ամբողջությամբ կնորոգվի Եղվարդ գյուղից մարզկենտրոն տանող նոր ճանապարհը: Սահմանին մոտ լինելու փաստը բնակիչներին չի անհանգստացնում. նրանք շարունակում են շենացնել իրենց գյուղը:

Նվեր Սաֆարյան (Ագարակ գյուղի բնակիչ) - Գյուղում խանութ է կառուցվում, գյուղում խանութ չկար, այսօր առաջին անհրաժեշտության մթերքների համար պետք է հասնեինք մարզկենտրոն Կապան:

153 բնակիչ ունեցող Ագարակն ապահովված է միջհամայնքային տրանսպորտով: Մեր հիմնական խնդիրները կարծես թե լուծվում են՝ նշում են գյուղացիները:

Նվեր Սաֆարյան - Խմելու ջրի համար ջրավազան է կառուցվում, իսկ լուսավորություն արդեն ունենք:

Կարո Ավանեսյան - Բոլոր սահմանային գյուղերում լսելով բնակիչներին անհանգստացնող հարցերը՝ գրի ենք առնում և լուծումներ տալիս:

Գերատեսչական խմբի հաջորդ կանգառը սահմանամերձ Եղվարդն էր: Տեղացիներին մտահոգում է խմելու և ոռոգման ջրի հարցը: 

Սյունիքի մարզպետի տեղակալի խոսքով՝ գյուղի ջրամատակարարման հարցը լուծվել է։ Այս տարվա օգոստոսից Եղվարդը կունենա շուրջօրյա ջրամատակարարում։

Հեղինակ՝ Արմինե Սիմոնյան