ԱԺ «Լուսավոր Հայաստան» խմբակցության ղեկավար Էդմոն Մարուքյանը քննադատեց Ընտրական օրենսգրքի փոփոխությունների նախագիծը՝ դեմ արտահայտվելով ԱԺ արտահերթ ընտրությունները բացարձակ համամասնական ընտրակարգով անցկացնելու՝ իշխանությունների նախաձեռնությանը:
«Իշխանությունն առանց ընդդիմադիր ուժերի ընդունում է Ընտրական օրենսգիրք և այն այսօր ընդունելով՝ կասկածի տակ է դնում հունիսի 20-ին սպասվող ԱԺ արտահերթ ընտրությունները»,- հայտարարեց Մարուքյանը:
ԼՀԿ ղեկավարի խոսքով՝ ժողովրդին զրկել են Հանրապետության նախագահ ընտրելու իրավունքից, զրկել են Երևանի, Գյումրիի և Վանաձորի քաղաքապետներ ընտրելու իրավունքից, հիմա զրկում են նաև պատգամավոր ընտրելու իրավունքից: «Ռեյտինգային ընտրակարգը համամասնական ընտրակարգի մեջ է, և ՀՀ-ում ընտրությունները համամասնական ընտրակարգով են: ԱԺ ամբիոնից մարդիկ ասում են՝ մեծամասնականը չարիք է եղել: Մեծամասնականը չարիք չի եղել, փող բաժանելն է չարիք եղել: Հիմա ինչ տարբերություն՝ ցուցակի համար փող բաժանո՞ղը բաժանի, թե՞ անձի համար բաժանի: Պրոբլեմն ընտրակարգը չի, այլ բարքերը»,- ասաց Մարուքյանը՝ կոչ անելով թույլ չտալ նախկին բարքերի կրկնությունը:
