Հայաստանի տարածքը 29743 կմ է, սահմանազատման արդյունքում ՀՀ տարածքը պետք է լինի 29743 կմ: Ինչպե՞ս է որոշվելու: Քարտեզների վրա այդ գծերն ամբողջությամբ կան, պետք է գնալ, կանգնել, գետնի վրա, այդ գծերի սահմանազատումն անել այնպես, ինչպես արվել է Կիրանցում և մնացած տեղերում: Այդ մասին Կառավարության՝ հոկտեմբերի 15-ի ճեպազրույցում ասաց վարչապետ Նիկոլ Փաշինյանը՝ մանրամասնելով, թե ինչպես է տեղի ունենալու սահմանազատման գործընթացը:
Անդրադառնալով Ադրբեջանի նախագահի՝ Հայաստանին առնչվող հայտարարություններին՝ լրագրողը հետաքրքրվեց, թե որքանով են դրանք տեղավորվում խաղաղության գործընթացի համատեքստում։ Փաշինյանը պատասխանեց՝ նման հայտարարություններ միշտ էլ եղել են։
«2025 թվականի հունվարին, 2024 թվականի դեկտեմբերին, 2024 թվականի հոկտեմբերին, մայիսին և ընդհանրապես ցանկացած պահի կան բազմաթիվ հայտարարություններ, գործոններ, որոնք չեն բռնում խաղաղության հետ, չեն բռնում. բա բարդությունը դա է: Բա եթե ամեն ինչ բռներ խաղաղության հետ, և խաղաղություն լիներ, խաղաղության անհրաժեշտություն չէր լինի, որովհետև խաղաղություն կլիներ:
Բա քաղաքական գործչի, Կառավարության և առաջնորդի գործը այն է, որ այդ միջավայրում կարողանա հասնել նրան, ինչին դժվար է թվում հասնելը, կամ նույնիսկ՝ անհնար»,- ասաց նա:
Այս համատեքստում Փաշինյանը հիշեցրեց Ազգային ժողով-Կառավարություն հարցուպատասխանի ժամանակ արած իր այն մեկնաբանությունը, որ ամեն հայտարարության վրա հնարավոր է քարուքանդ անել խաղաղությունը, մինչդեռ ՀՀ իշող ուժի ռազմավարությունն այլ է՝ շահագրգիռ լինել խաղաղությամբ:
