Արմեն Գրիգորյանին աշխատանք եմ առաջարկել վարչապետի աշխատակազմում: Ինքը ընդհանրապես պետական ծառայության մեջ առաջիկայում նախընտրում է պաուզա վերցնել: Ես ըմբռնումով ու հարգանքով եմ վերաբերվում որոշմանը: Այդ մասին ճեպազրույցի ժամանակ ասաց վարչապետ Նիկոլ Փաշինյանը՝ անդրադառնալով Արմեն Գրիգորյանին ԱԽ քարտուղարի պաշտոնից ազատելու որոշմանը և նոր պաշտոնի հնարավոր նշանակմանը:
«Ես ցանկացել եմ, որ ներգրավված մնա պարոն Գրիգորյանը պետական աշխատանքում, այս փուլում նա նախընտրում է դադար վերցնել, ինչին ես հարգանքով եմ վերաբերվում»,- ասաց նա:
Վարչապետ Փաշինյանը նաև տեղեկացրեց, որ ինքն է կայացրել Արմեն Գրիգորյանին պաշտոնից ազատելու որոշումը:
«Ցանկացած քաղաքական պրոցես իր հետ բերում է որոշակի ազդեցություններ, հետևանքներ, վերադասավորումներ, և սա պետք է դիտարկել այդ համատեքստում:
Այնպես չէ, որ ես Արմեն Գրիգորյանի աշխատանքից դժգոհ եմ եղել, բայց այնպես էլ չէ, որ ես ինքս իմ աշխատանքից այնքան գոհ եմ, որ համարում եմ կատարյալ: Կարծում եմ, որ այդպիսի որոշումները նորմալ են քաղաքականության մեջ. դա հայեցողական պաշտոն է, այդ հայեցողությունը վարչապետինն է»,-ասաց նա:
Հիշեցնենք, որ այսօր վարչապետ Նիկոլ Փաշինյանը երկու որոշում է ստորագրել, որոնցից մեկի համաձայն՝ Արմեն Գրիգորյանն ազատվել է ԱԽ քարտուղարի պաշտոնից, մեկ այլ որոշման համաձայն՝ այդ պաշտոնում նշանակվել է ԱԺ նախկին նախագահ Ալեն Սիմոնյանը:
