175 մլն 360 հազար դրամ կհատկացվի միջազգային աճուրդից հայկական բացառիկ մշակութային արժեք ձեռք բերելու համար
Պահուստային ֆոնդից 175 մլն 360 հազար դրամ է հատկացվում, որպեսզի Լոնդոնի միջազգային աճուրդում վաճառվող հայկական բացառիկ մշակութային արժեքը, որը 1188 թվականին պատրաստված և քանդակված՝ եկեղեցու փայտյա դռան փեղկ է, ձեռք բերվի և Հայաստան տեղափոխվի: Այդ մասին Կառավարության՝ դեկտեմբերի 18-ի նիստին ասաց ԿԳՄՍ նախարար Ժաննա Անդրեասյանը՝ ներկայացնելով չզեկուցվող հարցերից մեկը:
«Այն փորագրությունները, զարդանախշային այն համակարգը, որ կարող ենք տեսնել, ցույց է տալիս, որ սա եզակի նմուշ է: Ընդ որում՝ այդ զարդանախշային համակարգի տիպաբանությունը լիովին համահունչ է հայկական միջնադարյան գեղարվեստական ավանդույթներին:
Մինչև 1990-ական թվականները մեզ հայտնի էր միայն 8 նման կտորի մասին [տեղեկություն], և փայտի փորագրության նմուշները բացառիկ են: Այս պարագայում խոսում ենք մի նմուշի մասին՝ այդ 8-ից մեկի, որը շրջանառության մեջ է դրվել 1980-ականների վերջերին և գտնվել է Նյու Յորքի մասնավոր հավաքածուում:
ԿԳՄՍՆ-ն այժմ իրականացնում է միջազգային աճուրդների դիտանցումներ, և մեզ հետաքրքրող մշակութային արժեքները, որոնք մեր ժառանգության կարևոր մասն են, փորձում ենք ձեռք բերել:
Բոլորովին վերջերս Արշիլ Գորկու մի կտավ ենք ձեռք բերել, որը շուտով կլինի Հայաստանում. այդ աշխատանքի ժամանակ ենք նկատել այս փեղկը: Սա հին հայկական եկեղեցիների մուտքի համար օգտագործված փեղկ է՝ Բագրատունյաց շրջանին բնորոշ: Իրականացվել են նաև համապատասխան ռադիոածխածնային վերլուծություններ, որոնք վկայում են նրա տարիքի մասին: Կան նաև հրապարակված հոդվածներ, որոնք վկայում են դռան մշակութային նշանակության մասին: Նաև գործուղել էինք մասնագետ, որը տեղում համոզվել է, որ այն, ինչ ձեռք ենք բերում, բացառիկ նշանակություն ունի:
Նախատեսում ենք, որ փեղկը կցուցադրվի Հայաստանի պատմության թանգարանում»,- ասաց նա:
Վարչապետ Նիկոլ Փաշինյանն իր հերթին հիշեցրեց, որ նախորդող շրջանում Կառավարությունը Մատենադարանի համար երկու բացառիկ Աստվածաշունչ է ձեռք բերել:
