ՀԱԵ-ի բարենորոգման օրակարգի ամբողջ իմաստն այն է, որ ունենանք բարեվարքության ապահովման մեխանիզմներ. Փաշինյան

Հայ Առաքելական եկեղեցու (ՀԱԵ) բարենորոգման օրակարգի ամբողջ իմաստը, նպատակն այն է, որ ոչ թե մենք կռահումներ կամ արտահոսքեր ունենանք, այլ ունենանք բարեվարքության ապահովման մեխանիզմներ: Այդ մասին կառավարության ճեպազրույցի ժամանակ ասաց վարչապետ Նիկոլ Փաշինյանը՝ անդրադառնալով հարցին, թե Փաշինյանը բարձրաստիճան այլ հոգևորականների վերաբերյալ այլ տվյալներ ունի, որոնք վերաբերում են կուսակրոնության ուխտը խախտելուն:

Այս համատեքստում Փաշինյանը համեմատականներ անցկացրեց պաշտոնյաների և հոգևորականների միջև՝ նշելով, որ պաշտոնյաների դեպքում ստուգվում է վերջիններիս՝ բարեվարքության համապատասխանությունը, իսկ ՀԱԵ-ի բարձրաստիճան հոգևորականների դեպքում չպիտի՞ լինեն նման մեխանիզմներ:

«Մենք մի վարչության պետ ենք նշանակում, բարեվարքության ստուգում է անցնում, բա կաթողիկոսի թեկնածուն բարեվարքության ստուգում պիտի չանցնի՞»,- ասաց նա՝ ընդգծելով, որ խոսքը ոչ թե մեկ անձի, այլ առհասարակ բարեվարքության մասին է, որը, որպես ինստիտուտ, ՀԱԵ-ում ներդրված չէ:

«Բարենորոգման առանցքային նպատակներից և օրակարգերից մեկը դա պետք է լինի, որպեսզի մենք ոչ թե կռահումներ ունենանք, այլ ունենանք որոշակի մեխանիզմներ, որպեսզի խնդիրը ինստիտուցիոնալ ձևով լուծվի»,- ասաց նա: