Աշխարհում տեռորիստներն ասոցացվում են վախկոտության, ճղճիմության, մարդկային ամենացածր արժեքների և առհասարակ անսկզբունքայնության հետ, որովհետև թույլ, ստոր, վախկոտ, նենգ, ողորմելի մարդը կարող է գնալ և տոռորիզմ իրականացնել: Վառ օրինակն այս դահլիճում, այս շենքում իրականացված «հերոսներն են», որոնք, ի դեպ, սերում են Դաշնակցությունից: Այդ մասին Ազգային ժողովում «Հայաստան» խմբակցության պատգամավոր Արթուր Սարգսյանի նկատմամբ հանրային քրեական հետապնդում հարուցելու՝ ՀՀ գլխավոր դատախազի միջնորդագրի քննարկման ժամանակ ասաց «Քաղաքացիական պայմանագիր» խմբակցության պատգամավոր Վահագն Ալեքսանյանը:
«Պատիվ-թասիբ ունեցող մարդը տեռորիզմի հետ չի կարող գործ ունենալ, որովհետև ցանկացած տեռորիզմ անսկզբունքայնության դրսևորում է, ցանկացած տեռորիզմ պատվի ի սպառ բացակայության դրսևորում է: Ցանկացած տեռորիզմ մարդու ցածրագույն արժեքի մասին վկայող բան է, որովհետև տեռորիզմի ժամանակ թքած ունես՝ ում ես սպանում: Տեռորիզմի ժամանակ անմեղ մարդկանց, պատահական մարդկանց սպանում ես կամ կյանքին ու առողջությանը ծանր, ծանրագույն վնաս ես պատճառում, ինչ է թե՝ նպատակներիդ հասնես»,- ասաց նա:
Եզրափակելով խոսքը՝ Ալեքսանյանը հայտարարեց՝ ամեն հանցագործի ու ստահակի հասնելու է արդարադատությունը. «Ցանկացած մեկը, ով ձեռք կբարձրացնի ՀՀ ժողովրդի վրա, նրա ձեռքը կկոտրվի: Ցանկացած մեկը, ով հայ ազգին կանվանի «անասուն», նրա լեզուն կչորանա: Ցանկացած մեկը, ով հետևորդներին կասի «էշ», այստեղ արդեն թող հետևորդները մտածեն»:
Հիշեցնենք, որ Քննչական կոմիտեն ներկայացրել էր «Սրբազան պայքար» շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքի առթիվ նախաձեռնված քրեական վարույթի շրջանակներում գաղտնի քննչական գործողությունների արդյունքում ձեռք բերված ձայնագրությունները։
