ԱՄՆ-ի հետ երկկողմ օրակարգից բացի՝ տեսնում ենք նոր վարչակազմի ընդգծված հետաքրքրություն խաղաղության օրակարգին լայն աշխարհում և, մասնավորապես, Հարավային Կովկասում խաղաղության օրակարգի առաջմղման ու երկարաժամկետ խաղաղության հաստատման ուղղությամբ: Այդ մասին ԱԺ մշտական հանձնաժողովների համատեղ նիստի ժամանակ՝ 2024-ի պետբյուջեի կատարողականի նախնական քննարկումներին, ասաց ՀՀ ԱԳ նախարար Արարատ Միրզոյանը:
«Ե՛վ մենք, և՛ ԱՄՆ վարչակազմը, ինչպես նաև շատ այլ գործընկերներ աշխարհում համարում ենք, որ իրականում պատմական հնարավորություն կա Հարավային Կովկասում ունենալու այդ խաղաղությունը: Կա հնարավորությունների բավականին լայն պատուհան:
Իհարկե, առանցքայինը մեր կարգավորման գործընթացն է Ադրբեջանի հետ, և այս առումով ևս այս տարվա առաջին կիսամյակում առիթներ եղել են, քննարկումներ ունեցել ենք»,- ասաց Միրզոյանը, հիշեցրեց Անթալիայի դիվանագիտական ֆորումի շրջանակում Ադրբեջանի ԱԳ նախարար Ջեյհուն Բայրամովի հետ հանդիպման մասին, ինչպես նաև Ալբանիայի մայրաքաղաքում վարչապետ Փաշինյանի և Ադրբեջանի նախագահ Իլհամ Ալիևի զրույցի մասին:
«Մենք հույս ունենք, որ առաջիկայում այս խոսակցությունն ավելի գործնական և համգանանալից կերպով հնարավոր կլինի շարունակել»,- ասաց նա:
Ըստ Միրզոյանի՝ տարվա առաջին կիսամյակի «աննախադեպ ձեռքբերումը» Հայաստան-Ադրբեջան կարգավորման մասով պայմանագրի տեքստի համաձայնեցումն էր, տեքստի շուրջ ավարտված բանակցությունները:
«Հայաստանը հայտարարեց և այսօր էլ հայտարարում է, որ մենք պատրաստ ենք րոպե առաջ սկսել խորհրդակցություններ՝ որոշելու ստորագրման օրը, տեղը: Ադրբեջանն իր դիրքորոշումներն է հայտարարում, կան որոշակի նախապայմաններ»,- ասաց նա՝ նշելով, որ նախապայմանները վերաբերում են Մինսկի խմբի և դրան վերաբերող կառույցների լուծարմանը:
Ըստ Միրզոյանի՝ հայկական կողմի համար այդ օրակարգը հասկանալի և ընդունելի է, բայց կան «տեխնիկական նյուանսներ», այն է՝ Մինսկի խմբի լուծարման գործընթացը պետք է սկսվի խաղաղության պայմանագրի ստորագրմանը զուգահեռ:
«Երբ կլինի ինստիտուցիոնալիզացված խաղաղություն, իսկ ես այս տերմինի տակ նկատի ունեմ խաղաղության հաստատման ստորագրված փաստաթուղթ, և կոնֆլիկտը կավարտվի թղթի վրա, տրամաբանորեն հարկ չի լինի ունենալ այս կոնֆլիկտին վերաբերող որևէ կառույց միջազգային հարթակներում»,- ասաց նա:
