Առաջարկվում է կատարել լրացում, որպեսզի հատուցման կարգավորումները տարածվեն նաև ՊՊԾ զինծառայողների վրա
«Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում լրացում կատարելու մասին օրինագծի ընդունման անհրաժեշտությունը ծագել է ՀՀ Անվտանգության ծառայությունից Պետական պահպանության ծառայության առանձնացման հետևանքով և կրում է առավելապես տեխնիկական բնույթ: Այն նպատակ է հետապնդում ապահովելու ՀՀ պետական պահպանության ծառայության այն զինծառայողների սոցիալական երաշխիքները, որոնց կյանքին կամ առողջությանը կարող է վնաս պատճառվել մարտական գործողությունների մասնակցելու կամ հակառակորդի հետ շփման գծում մարտական հերթապահություն կամ հատուկ առաջադրանք կատարելու ժամանակ կամ հակառակորդի նախահարձակ գործողությունների հետևանքով: Այս մասին օրենքի նախագծի քննարկման ժամանակ ասաց ՀՀ պետական պահպանության ծառայության պետի տեղակալ Գրիգորի Առաքելյանը:
Նախագիծը քննարկվել է ԱԺ պաշտպանության և անվտանգության հարցերի մշտական հանձնաժողովում, արժանացել դրական եզրակացության:
«Պաշտպանության մասին» օրենքի 3-րդ հոդվածի առաջին մասի 7-րդ կետի համաձայն՝ ՊՊԾ-ն դասվում է այլ զորքերի հաշվին, և պատերազմի կամ ռազմական դրության ժամանակ ԶՈՒ կազմում կարող է ընդգրկվել նաև ՊՊԾ-ն, ուստի, զուտ սոցիալական երաշխիքներից ելնելով, առաջարկում ենք սրան կողմ քվեարկել»,- ասաց Առաքելյանը՝ պատասխանելով ընդդիմադիր պատգամավոր Արթուր Խաչատրյանի հարցին, որը վերաբերում էր նրան, թե արդյոք ՊՊԾ-ն երբևէ ներգրավվելո՞ւ է թշնամու դեմ մարտական գործողություններին:
Պաշտպանության և անվտանգության հանձնաժողովի անդամ Քրիստինե Պողոսյանի խոսքով՝ քանի որ նախկինում ՊՊԾ-ն գտնվում էր ԱԱԾ-ի ենթակայության ներքո, ավտոմատ կերպով օգտվում էր զինծառայողների փոխհատուցման բոլոր առավելություններից, քանի որ դարձել է առանձին մարմին, անհրաժեշտություն է առաջացել լուծել տեխնիկական խնդիր և ավելացնել նաև ՊՊԾ ծառայությունը:
«Ինչ վերաբերում է ներգրավվելուն, հարգարժան պարոն Խաչատրյան, հուսով եմ՝ ես և դուք՝ որպես ՀՀ քաղաքացի, երբեք դա չենք տեսնի, և կանենք ամեն ինչ, որպեսզի Հայաստանը չներգրավվի պատերազմում, այլև կարիք չլինի ծառայությանը ներգրավվել պատերազմական իրավիճակում»,- նշեց Քրիստինե Պողոսյանը:
