2021 թվականին Եվրամիությունը նախաձեռնել էր ԵՄ անդամ չհանդիսացող երրորդ երկրների, այդ թվում՝ Հայաստանի հետ քրեական վարույթներով իրավական համագործակցության ոլորտում իրավասու մարմինների և Եվրաջասթի միջև համագործակցության մասին համաձայնագրի կնքման բանակցություններ: 2023 թվականի ապրիլի 4-ին ՀՀ Կառավարությունը հավանության արժանացրեց նախագիծը, իսկ ապրիլի 5-ին ՀՀ ԱԳ նախարարը Բրյուսելում ստորագրեց այն: Այժմ ««ՀՀ-ի և ԵՄ-ի միջև ՀՀ քրեական վարույթներով իրավական համագործակցության ոլորտում իրավասու մարմինների և ԵՄ քրեական արդարադատության ոլորտում համագործակցության գործակալության (Եվրաջասթ) միջև համագործակցության մասին» համաձայնագիրը վավերացնելու մասին» հարցը մտել է խորհրդարան:
ՀՀ արդարադատության նախարարի տեղակալ Կարեն Կարապետյանը նշեց, որ համաձայնագիրն անցել է «ՀՀ միջազգային պայմանագրերի մասին» ՀՀ օրենքով նախատեսված ներպետական բոլոր ընթացակարգերը: ՍԴ-ն ընդունել է նաև նախագծի դրույթները Սահմանադրությանը չհակասելու և համապատասխանության վերաբերյալ որոշում:
«Ընթացակարգերը զգալիորեն կնպաստեն ԵՄ պետությունների հետ անհրաժեշտ հաղորդակցման արագությանը, ցուցաբերված փոխադարձ աջակցության որակին և օպերատիվությունը»,- ասաց նա, նշեց, որ արդյունքում ուղիղ կապ կհաստատվի ՀՀ-ի և ԵՄ-ի համապատասխան մարմինների միջև կոնտակտային անձանց նշանակման և գործուղման միջոցով:
Ըստ Կարեն Կարապետյանի՝ սա այն եզակի մեխանիզմներից է, որը թույլ է տալիս այս փուլում ԵՄ ինտեգրման գործընթացների շրջանակում արդեն իսկ պրակտիկ և արդյունավետ համագործակցության խողովակներ և մեխանիզմներ ներդնել ԵՄ գործընկերների հետ հարաբերություններում:
Հարակից զեկուցող Արման Եղոյանը հավելեց՝ համաձայնագիրը, բացի ԵՄ անդամ երկրներից, կնքել են նաև ԵՄ անդամ չհանդիսացող երկրներ, այդ թվում՝ ԱՄՆ-ն, Նորվեգիան, Շվեյցարիան:
«Համաձայնագրի վավերացումից հետո Հայաստանը Եվրաջասթում նշանակելու է համակարգող դատախազ, որը դառնալու է Եվրաջասթի դատախազական կոլեգիայի անդամ և օժտված է լինելու համապատասխանաբար ԵՄ անդամ չհանդիսացող երկրների համար սահմանված բոլոր իրավունքներով, նախաքննական և դատաքննական փուլում տեղեկատվություն է հայցելու և սահմանված կարգով ստանալու ԵՄ անդամ երկրների գործընկերներից, ինչպես նաև Հայաստանն է արդեն պարտավորություն ստանձնում՝ նմանատիպ տեղեկատվություն տրամադրելու իր գործընկերներին դրա անհրաժեշտության դեպքում:
Սա շատ կարևոր քայլ է ՀՀ-ԵՄ հարաբերություններում»,- ասաց Եղոյանը:
ՔՊ խմբակցության պատգամավոր Սոնա Ղազարյանը ելույթի ժամանակ ընդգծեց՝ համաձայնագրի վավերացումով ինստիտուցիոնալ հիմքի վրա կդրվի ՀՀ-ԵՄ համագործակցությունը:
